Xroniki böyrək xəstəliyi olan hər bir pasient, həyatı davam etdirməsi üçün 2 seçim qarşısında olur: Dializ və ya böyrək nəqli.

 

Bugün hemodializ alan pasientlərin sayının artmasındakı ən vacib faktorlardan biri damaryolu əməliyyatlarındakı uğurlu inkişafdır. Çünki düzgün tətbiq edilmiş damaryolu hemodializ pasientlərinin böyrək nəqli olmadan da, uzun illər boyu rahat yaşaya bilməsinə səbəb olur.

 

Aztibb.az xəbər verir ki, bu barədə nefroloq Barat Yusubov məlumat verib.

 

Həkim bildirib ki, bəzi pasientlər uyğun donor olmadığı üçün, bəzilərinə əks göstəriş olduğu üçün, bəziləri isə maddi vəsait kifayət qədər olmadığından böyrək nəqli etdirə bilmir. Bu halda pasientin həyatının davam etdirilməsinə səbəb dializ ala bilməsidir, dializ ala bilməsi üçün isə labüd olan damaryoludur.

 

"Qalıcı damar yoluna sahib olmayan pasientlər ən qısa zamanda ölümə məhkum olurlar. 1962-ci ildə ilk dəfə Brescio və Shmino tərəfindən aparılan klassik fistul əməliyyatı hemodializdə bir cığır çəkmişdir. Bu hadisədən öncə, hemodializ üçün lazım olan qan kanula və kateterlərdə saxlanılırdı. Bu metodlar isə pasientin xəstəxanada qalmasına və həftələrlə günün müəyyən saatları dializ almasına səbəb olurdu. Bu metodların riski çox yüksək idi. Bundan başqa, hemodializ aparatları və filterlər kifayət qədər deyildi. Bu səbəbdən xroniki böyrək xəstələri əfsuslar olsun ki cəmi bir neçə ay yaşaya bilirdi", - deyə B.Yusubov bildirib.

 

Nefroloqun sözlərinə görə, bugün müasir katater və fistullar vasitəsi ilə pasiyentlər daha komfortlu və rahat şəkildə xəstəxanada daha qısa vaxt keçirir, dializ aldıqdan sonra normal həyatlarına davam edə bilirlər.