Məlumdur ki, ölkəmizdə pandemiya hələ də davam edir. Virusa yoluxmamamq üçün immuniteti gücləndirmək lazımdır. Güclü immunitet isə həm də düzgün, sağlam qidalanmadan asılıdır. Qarşıdan Novruz bayramı gəlir. Hər kəsin bayram süfrəsində şiniyyatlardan tutmuş isti yeməklərə kimi müxtəlif təamlar olur. Bəs bayram günlərində qidalanma zamanı əsasən nələrə diqqət edilməlidir? Bu günlərdə fiziki aktivlik nə dərəcədə önəmlidir?
Mərkəzi Gömrük Hospitalının fizioterapevti Səidə Kərimova Aztibb.az-ın bu mövzuda suallarını cavablandırıb.
Bayram günlərində necə aktiv qalmaq və çəki almamaq olar?
Bayramlarda çəki alma problemi demək olar ki, hamımızı narahat edir.
Süfrədə gözəl bayram şirniyyatları, biri-birindən dadlı yeməklər, normadan artıq evdə oturaq rejimi artıq çəkiyə səbəb ola bilər. Bayramlarda insanlar orta hesabla azı 0,5 kq artıq çəki alır. Çox olmasa da, bu, daha da böyük rəqəm ola bilər və əksər hallarda həmin artıq kilolar getmir. Beləliklə, bayramlar illik çəki artımında əsas rol oynaya bilər.
1. Bayramlarda aktiv qalın.
Bir çox ailələrdə bayram günlərində evdə oturub televizora baxmaq ya sosial şəbəkələrdə vaxt keçirmək artıq bir vərdişə çevrilir. Nəzərə almalıyıq ki, fiziki passivlik sağlamlığmıza ziyandır.
Ən azı yürüş edərək fiziki aktivliyə qatılmaq lazımdır. Ümumdünya Səhiyyə Təşkilatının tövsiyələrində bildirilir ki, gündə ən azı 30 dəqiqə, həftədə 5 gün fiziki aktivlik olmalıdır. Orta templə yürüş bu aktivliyin bir növüdür. Velosiped sürmək və üzgüçülük də fiziki aktivliyi normada saxlamağa kömək edə bilər.
2. Gününüzü planlaşdırın.
Hər gün yuxarıda qeyd olunan fiziki aktivliyi planlaşdırın. Əgər siz axşam qonaqlarla süfrə başında oturacaqsınızsa, bu yeməkdən qabaq nə qədər yeyəcəyinizi planlaşdırın.
3. Yeməyinizə nəzarət edin.
Süfrədə şirniyyatların olması onların həddindən çox istehlakına səbəb ola bilər. Yemək vərdişlərinizə nəzarət edin: ancaq ac olanda yeyin. Şirniyyat əvəzinə meyvə və tərəvəzləri yemək daha faydalıdır.
4. Yemək zamanı başqa işlər görməyin.
Əgər yemək zamanı sizin fikiriniz smartfonda ya TV-dədirsə, bu zaman normadan artıq yemək riski çoxalır. Yemək zamanı vaxtı sırf yemək prosesinə ayırmaq, porsiyalara fikir vermək və balaca boşqablardan istifadə etmək vacibdir.
5. Yuxu rejiminizə riayət edin.
Araşdırmalar göstərir ki, az yatan insanlarda aclıq hissi daha tez yaranır və fiziki aktivliyi daha aşağı olur.
Qarşıdan gələn bayramınız mübarək olsun! Sağlam olun!
