Qamət duranda və oturanda bədənimizin pozisiyasina deyilir. Sağlam qamət isə gündəlik hərəkətlərimizi vücudumuzun minimal yüklənməsi ilə təmin edir.
Qaməti formalaşdıran əsas komponent onurğa sütunudur. Arxadan baxanda onurğamız düz xətt kimi görünür. Yan tərəfdən baxsaq, onun qabarıq və çökək zolaqları ilə (təbii lordoz ve kifoz) təbii S-vari forması var. Qamətimizi düz saxlamağa vücud əzələlərimiz kömək edir.
Aztibb.az xəbər verir ki, Mərkəzi Gömrük Hospitalının Poliklinika şöbəsinin tanınmış həkimi, Barselona Skolioz Məktəbində ixtisaslaşmış həkim-fizioterapevt Səidə Kərimova “Həkim məsləhəti” rubrikasında “Sağlam qamət nədir?” sualını cavablandırıb.
"Biz qamətimizi düz saxlamağa çalısmalıyıq ki, gələcəkdə ağrı, hərəkət məhdudlaşması və digər problemlərlə üzləşməyək”, - deyə bildirən həkim qeyd edib ki, əslində "ideal" qamət yoxdur, sağlam qamət eyni zamanda insan üçün komfortlu olmalıdır.
Həkimin sözlərinə görə, bədənimiz yaxşı qamətdə olmayanda bəzi əzələlərimiz qısalır, bəziləri gərilir. O, uzun müddət ərzində yaranır və vücudumuz düz olmayan qamətə öyrəşir. Qısalmış əzələ və onurğanın xırda oynaqların hərəkət həcmi azalır, onlar ağrı mənbələrinə çevrilə bilər və asanlıqla zədələnir.
S.Kərimova əlavə edib ki, düz olmayan qamətdə oynaq və əzələlərdə zəiflik və ağrı yarana bilər. Belə halda oynaq və əzələlər zədələnməyə qarşı daha həssas olur. Zamanla bədənimiz düz olmayan qamətə öyrəşir.
Həkim, həmçinin qaməti yaxşılaşdırmaq üçün tövsiyələr verib:
- Ayaqüstə olanda düz durmaq üçün kiçik bir məsləhət: özünüzü hündürboy hiss edin! Bədən yükünüzü hər iki ayaq üzərində bərabər paylamağa çalışın.
- Döş sümüyünü bir az yuxarıya doğru aparın, çiyinlərinizi bir az arxaya və aşağı tutun. Yadınızda saxlayın ki, hərəkətlər sizə narahatlıq verməməlidir.
- Oturanda və kompüter arxasında çalışanda monitorunuz göz səviyyəsində olsun. Stulunuzun hündürlüyünü düşünün ki, iş görəndə çiyinlərinizi qabağa “yığmağa” ehtiyac olmasın. Dirsəklərinizi bədəninizə yaxın və 90-120 dərəcədə büküb tutun. Bud-çanaq oynağınız da təxmini eyni (90-120) dərəcə bükülmədə olmalıdır.
- Hər 20-30 dəqiqədən bir çalışın durun və bir az hərəkət edin. Vücudumuzun əzələ və oynaqları hərəkət həcmini saxlamalıdır.
Qeyd edək ki, Mərkəzi Gömrük Hospitalının rəsmi internet səhifəsində “Düz qamət - sağlam həyat” rubrikasında bu barədə daha ətraflı məlumat əldə edə bilərsiniz. https://customshospital.az/hekim-mesleheti-duz-qamet/