Yaşlanma prosesinin qarşısını almaq üsullarını axtaran tədqiqatçılar çoxdandır ki, həyat tərzinin yaxşılaşdırılmasının sağlamlığa təsir edə biləcəyini iddia edirlər. Tədqiqatlar göstərib ki, uzunömürlülüyün sirləri bağırsaqlarla bağlı ola bilər, çünki, o, bir çox xəstəlik törədən mikroblarla mübarizə aparmağa kömək edir.

Aztibb.az medikforum.ru-ya istinadla xəbər verir ki, Siyetldə yerləşən Sistem Biologiyası İnstitutunun tədqiqatçılar qrupu aşkar edib ki, bağırsaqların mikrobiomu yaş ötdükcə daha da müxtəlif və unikal olur. Müəlliflər sağlam qocalmaya imkan yaradan üç əsas bakteriya aşkar ediblər. Onlar bağırsaqlarda Bacteroides cinsindən olan daha az bakteriya, iltihabın azaldılması, şəkər və yağ metabolizmasının yaxşılaşması və bədən quruluşunun arıq tipi ilə əlaqəli olan Akkermansia və Christensenella cinsindən isə daha çox bakteriya müşahidə ediblər.

Dörd addım bağırsaqları uzun ömür sürməyə imkan yaradan bakteriyalarla zənginləşdirməyə kömək edə bilər:

Tərəvəzlər

Xüsusilə müəyyən şəkəri özündə saxlayan yarpaqlı göyərtilər sağlam bağırsaq bakteriyalarının artmasına imkan yarada bilər.

Qıcqırdılmış məhsullar

Bu yaxınlarda aparılmış tədqiqatlar göstərib ki, qıcqırdılmış məhsullar bağırsaqlarda yaşayan trilyonlarla bakteriyanın tərkibini dəyişdirə bilər. Sübut edilib ki, yoğurt, kefir, turşu kələm, kimçi və çay göbələyi kimi məhsullar bütün orqanizmdə iltihabın səviyyəsini aşağı salır.

Probiotiklər

Bazarda əlçatan olan qida əlavələrinin əksəriyyəti Lactobacilli və Bifidobacter ailələrindən olan bakteriyaları özündə saxlayır. Onlar mədənin turş mühitində sağ qala bilirlər.

Prebiotiklər

Əlavələr kimi prebiotiklərin qəbulu bağırsaqlarda olan, infeksiyalarla mübarizə aparmağa kömək edən immun sistemini möhkəmləndirməyə şərait yarada bilər.