Bu barədə uşaq psixoloqu Arzu Adgözəlova sosial şəbəkədə məlumat paylaşıb.

 

O, bildirib ki, aqressiya çox vaxt ailə münasibətlərindən qaynaqlanır. Bir növ uşaq ailənin güzgüsünə çevrilir. Ona görə də uşağın davranışlarına təlaşlanmazdan əvvəl ailə münasibətinizə nəzər yetirin.

 

Aşağıdakı sualları cavablandırın:

 

- Övladınızla kifayət qədər vaxt keçirir və oyun oynayırsınızmı?

- Gün ərzində övladınızı neçə dəfə qucaqlayır, öpür və onu sevdiyinizi deyirsiniz?

- Övladınız danışanda sona qədər diqqətlə dinləyirsinizmi?

- Gündə neçə dəfə övladınıza səsinizi yüksəldirsiniz?

- Övladınızdan üzr istəyə bilirsinizmi?

 

Əgər ailədə hər şey qaydasındadırsa, uşağın ətrafını nəzərdən keçirmək lazımdır.

 

Bəs uşaq aqressiya göstərən zaman necə davranmalı? Bəzən uşaqlar diqqət çəkmək üçün də belə davranışlar nümayiş etdirirlər. Məsələn, uşaq sizi vurursa, bu zaman emosional reaksiya verməyin ciddi ifadə və düz səs tonu ilə "olmaz!" deyin və uşağı özünüzdən bir qədər aralı tutun.

 

Belə olan halda uşaqlar çox vaxt daha da aqressivləşir və ağlamağa başlayır. Valideyn səbirli olmalı və sakitliyini qoruyaraq qətiyyən uşağa qışqırmamalı və ya onu sakitləşdirməyə çalışmamalıdır:

 

"Siz öz işinizlə məşğul olun və uşaq sakitləşənə qədər onunla ünsiyyətə keçməyin (göz kontaktı da daxil). Lakin uşaq sakitləşdikdən sonra mütləq ona yaxınlaşın və birgə vaxt keçirin, oyun oynayın. Beləliklə, ana uşaqda düzgün davranışı möhkəmləndirmiş olur. Əlbəttə ki, bunu da unutmayın uşağınızın emosional dəstəyə ehtiyacı var və bu səbəbdən ağlayırsa, onu qucaqlamalı və dəstəyinizi hiss etdirməlisiniz.

 

Övladınıza müsbət motivasiya aşılayın. Etdiyi yaxşı hərəkətləri vurğulayın, xoşagəlməz hərəkətləri isə bacardıqca görməzdən gəlin. Lap kiçik yaşlardan uşağa gülləri, heyvanları incitməməyi, üzr istəməyi öyrədin. Öz nitqiniz və davranışlarınız ilə övladınıza nümunə olun. Ən əsası səbirli olun".