Azərbaycan Qida Təhlükəsizliyi İnstitutunun (AQTİ) nəzdində fəaliyyət göstərən Mərkəzi Fitosanitar laboratoriyası İngiltərənin “Fapas” şirkəti tərəfindən təşkil olunan qarğıdalı unu nümunəsində GMO-nun keyfiyyət göstəricilərinin (35S Promotor, NOS Terminator, FMV Promotor) təyini üzrə beynəlxalq səriştəlilik sınağına qatılaraq uğurlu nəticələr əldə edib.

Bu barədə Aztibb.az-a AQTİ-dən xəbər verilib.

Mərkəzi Fitosanitar laboratoriyası AZS ISO/IEC 17025:2020 “Sınaq və kalibrlənmə laboratoriyalarının səlahiyyətliliyinə dair ümumi tələblər" standartına əsasən Azərbaycan Akkreditasiya Mərkəzi tərəfindən akkreditasiyadan keçirilib. Laboratoriyada həyata keçirilən bütün müayinələr və analizlər sözügedən standartın tələblərinə tam uyğun şəkildə icra edilir.

Laboratoriya fəaliyyət göstərdiyi müddətdə Böyük Britaniya, Fransa, Rusiya və digər ölkələrdə təşkil olunan çoxsaylı beynəlxalq səriştəlilik sınaqlarında iştirak edərək yüksək nəticələr qazanıb. Əldə edilən bu uğurlar, laboratoriyanın tətbiq etdiyi müasir analitik metodların, qabaqcıl texnoloji avadanlıqların və mütəxəssislərin peşəkarlığının beynəlxalq səviyyədə təsdiqi deməkdir.