Azərbaycan Tibb Universitetində (ATU) tibb ixtisasları üzrə yeni tədris proqramlarının növbəti müzakirəsi keçirilib. 

ATU-dan Aztibb.az-a bildirilib ki, Elm və Təhsil Nazirliyi tərəfindən ali təhsil proqramlarının hazırlanması məqsədilə yaradılan Komissiyada "Əsas (baza ali) tibb təhsili səviyyəsi və Səhiyyə ixtisasları qrupu" üzrə İşçi Qrupunun həmsədri, Elmi-Tədqiqat Ağciyər Xəstəlikləri İnstitutunun direktoru İradə Axundovanın rəhbərliyi ilə baş tutan görüşdə komissiya üzvləri, ATU əməkdaşları, həmçinin 1 nömrəli Bakı Tibb və 2 nömrəli Bakı Baza Tibb kolleclərinin nümayəndələri iştirak ediblər. 

Tədbirdə ATU-nun Tədris Departamentinin rəhbəri Kamandar Yaqubov tibb ixtisasları üzrə yeni tədris proqramları ilə bağlı ilkin müzakirələrdən sonra əldə olunmuş rəy və təkliflərin qiymətləndirildiyini, əmək bazarının tələblərinə uyğun, müasir bilik və bacarıqlar əsas götürülməklə, tələbə yönümlü tədris proqramlarına üstünlük verildiyini diqqətə çatdırıb. 

İşçi Qrupun həmsədri İradə Axundova da müasir dövrdə tibbin qarşılaşdığı yeni çağırışlar əsasında ənənəvi ixtisaslarla yanaşı, yeni ixtisasların yaradılması və inkişaf etdirilməsi zərurətindən söz açıb. Bu prosesin həm səhiyyə xidmətlərinin keyfiyyətinin artırılması, həm də cəmiyyətin dəyişən ehtiyaclarına daha effektiv cavab verməyə imkan yaratdığını qeyd edən həmsədr yeni ixtisasların klinikalara sıx bağlı istiqamətlər olmasını nəzərə almaqla, müvafiq addımlar atılmasını tövsiyə edib. 

Daha sonra 1 nömrəli Bakı Tibb Kollecinin direktoru Nailə Əliyeva və 2 nömrəli Bakı Baza Tibb Kollecinin direktoru Dilarə Məmmədəliyeva təqdim etdikləri tədris proqramlarının hazırlanmasında beynəlxalq təcrübəyə əsaslanıldığını, xüsusən kadrların praktik bacarıqlarının gücləndirilməsi ilə bağlı müvafiq işlərin genişləndirilməsinə ehtiyac olduğunu vurğulayıblar. 

Tədris proqramlarının təkmilləşdirilməsi ilə bağlı fikirlərini bölüşən ATU-nun II Müalicə-profilaktika fakültəsinin dekanı İsrail Məhərrəmbəyli də öz çıxışında tibb bacı və qardaşlarının hazırlığının təkmilləşdirilməsinin mühüm əhəmiyyətini diqqətə çatdırıb. 

Aparılan geniş fikir mübadiləsindən sonra görüşdə səsləndirilən müxtəlif rəy, fikir və təkliflərin ümumiləşdirilərək, yaxın günlərdə yekun qərarın veriləcəyi bildirilib.