Ebola qızdırmasının Konqo Demokratik Respublikasının şərqində yayılmasının real miqyası təsdiqlənmiş rəqəmlərdən xeyli yüksəkdir.

Aztibb.az xəbər verir ki, bu barədə Ümumdünya Səhiyyə Təşkilatının (ÜST) epidemiologiya şöbəsinin rəhbəri Olivye le Polen məlumat verib.

“Alovlanma həm yoluxma sayına, həm də coğrafi yayılma baxımından genişlənməyə davam edir”, — o, Bunia şəhərində keçirilən brifinqdə bildirib.

Mütəxəssisin sözlərinə görə, hər gün tibb işçiləri yeni yoluxma hallarını qeydə alırlar. Bu isə “epidemiyanın həqiqi miqyasının hazırda müəyyən ediləndən daha böyük olduğunu göstərir”.

Le Polen əlavə edib ki, virusun yayıldığı bəzi bölgələrdən tam məlumat hələ əldə olunmayıb. Həmin ərazilərdə epidemioloji nəzarətin gücləndirilməsi tələb olunur.

Digər ciddi problem isə xəstəxanalarda yer çatışmazlığıdır. İturi, Şimali Kivu və Cənubi Kivu əyalətlərində yoluxanlar üçün cəmi 250 çarpayı mövcuddur.

Hazırda xəstələr xüsusi şöbələrdə və tibbi izolyatorlarda yerləşdirilir. ÜST nümayəndəsi epidemiyanın nə vaxt bitəcəyini və onun həqiqi miqyasını proqnozlaşdırmaqdan imtina edib.

Hökumət məlumatına görə, hazırkı alovlanma 15 mayda başlayıb. İndiyədək ölkədə 676 yoluxma qeydə alınıb, 136 nəfər isə həyatını itirib.

Ebola virusu yüksək hərarət, qusma, ishal və qanaxma ilə müşayiət olunan kəskin hemorragik qızdırma yaradır, yarasalar vasitəsilə insana, daha sonra isə yoluxmuş bədən mayeləri ilə insandan insana keçə bilir. Xəstəliyin ölüm göstəricisi yüksəkdir (orta hesabla 50%), spesifik müalicə yoxdur, buna görə əsas tədbirlər ciddi izolyasiya, dəstəkləyici terapiya və ölənlərin təhlükəsiz dəfni hesab olunur.