Yay mövsümü insanların ən çox açıq havaya üz tutduğu, dəniz və hovuz istirahətinin artdığı dövrdür. Günəşli hava və isti temperatur bir çox insan üçün enerji və rahatlıq mənbəyi sayılsa da, bu mövsüm dərimiz üçün ciddi risklər də yaradır. Xüsusilə son illərdə iqlim dəyişiklikləri nəticəsində temperaturun yüksəlməsi və ultrabənövşəyi şüaların daha güclü təsiri dəri problemlərinin artmasına səbəb olur.

Aztibb.az-ın məlumatına görə, ultrabənövşəyi (UV) şüalar dərinin vaxtından əvvəl qocalmasına, piqment ləkələrinin yaranmasına və dəri xərçəngi riskinin artmasına səbəb olan əsas amillərdəndir. İsti hava isə tərləməni artıraraq məsamələrin tutulmasına, akne və müxtəlif infeksiyaların yaranmasına şərait yaradır. Bu səbəbdən yay aylarında dəriyə qulluq, sadəcə, estetik məsələ deyil, həm də sağlamlığın qorunmasının vacib hissəsidir.

Ultrabənövşəyi şüalar dərinin dərin qatlarına təsir edərək kollagen liflərinin zədələnməsinə səbəb olur. Bu isə zamanla dəridə elastikliyin azalmasına, qırışların yaranmasına və erkən qocalma əlamətlərinin meydana çıxmasına gətirib çıxarır. Bundan başqa, uzun müddət günəş altında qalmaq dəri hüceyrələrinin zədələnməsinə və gələcəkdə xərçəng riskinin yüksəlməsinə səbəb ola bilər. Yayda geniş yayılan problemlərdən biri də günəş allergiyasıdır. Bu, dərinin günəş şüalarına qarşı həddindən artıq reaksiyası nəticəsində yaranır. Əlamətləri arasında qaşınma, qızartı, kiçik səpkilər və bəzi hallarda qabarcıqlar yer alır. Bu əlamətlər adətən günəşə məruz qaldıqdan bir neçə saat və ya bir neçə gün sonra ortaya çıxır.

Yay mövsümündə ən vacib qoruyucu vasitələrdən biri SPF tərkibli günəş kremləridir. İstifadə olunan günəş qoruyucusunun ən az SPF 30, ideal olaraq isə SPF 50+ olması tövsiyə edilir.