Əməliyyatdan sonrakı dövrdə pasiyentin vəziyyəti ağırlaşıb. O, yüksək hərarət, qarın nahiyəsində ağrılar və iltihabi proses əlamətləri ilə müxtəlif tibb müəssisələrinə müraciət edib. Lakin törəmənin xarakterinin tam aydın olmaması səbəbindən cərrahi müdaxilə təxirə salınıb.

 

Bu barədə Aztibb.az-a məlumat verən ATU-nun Tədris Cərrahiyyə Klinikasının II Cərrahiyyə şöbəsinin müdiri, professor Xaləddin Musayevin sözlərinə görə, pasiyent Tədris Cərrahiyyə Klinikasında ətraflı müayinədən keçirilib.

 

Professor Xaləddin Musayev qeyd edib ki, pasiyentin diaqnostikasında klinikanın şüa diaqnostika şöbəsinin müdiri, dosent Rasim Bayramovun radioloji rəyi mühüm əhəmiyyət kəsb edib. Aparılan görüntüləmə müayinələrinin nəticələri törəmənin lokalizasiyasının və xarakterinin daha dəqiq qiymətləndirilməsinə imkan verib. Kontrastlı kompüter tomoqrafiyası və digər diaqnostik müayinələrin nəticələrinə əsasən kor bağırsaq nahiyəsində yerləşən törəmə, eləcə də Kron xəstəliyi ehtimalı nəzərdən keçirilib. Pasiyentdə 39–40°C-yə çatan yüksək hərarətin davam etməsi səbəbindən təcili cərrahi müdaxilə qərarı verilib.

 

Əməliyyat zamanı kor bağırsağın qarının yan divarına sıx bitişdiyi və hərəkətsiz vəziyyətdə olduğu müəyyən edilib. Cərrahi manipulyasiyalar zamanı həmin nahiyədə təxminən 100–150 qram irinli möhtəviyyat aşkarlanaraq boşaldılıb. Daha sonra kor bağırsaq qübbəsində infiltrasiya olunmuş, dağılma mərhələsində olan törəmə müəyyən edilib.

 

Törəmənin xarakterinin dəqiqləşdirilməsi məqsədilə toxuma nümunələri histoloji müayinəyə göndərilib. Pasiyentə sağtərəfli hemikolektomiya əməliyyatı və bağırsaq keçiciliyinin bərpası məqsədilə ileotransvers anastomoz icra olunub.

 

Professor Xaləddin Musayev bildirib ki, hazırda törəmənin mənşəyi ilə bağlı bir neçə ehtimal mövcuddur. Bunlardan biri Kron xəstəliyi, digəri isə onkoloji prosesdir. Bundan əlavə, appendiks nahiyəsində uzun müddət davam edən iltihabi-infiltrativ proses nəticəsində də belə klinik mənzərənin yaranması mümkündür. Dəqiq diaqnoz yalnız histoloji müayinənin nəticələrindən sonra müəyyən ediləcək.

 

Mütəxəssis qeyd edib ki, hazırda pasiyentin vəziyyəti qənaətbəxşdir. O, sərbəst hərəkət edir, qidalanır və əməliyyatdan sonrakı dövr normal keçir. Histoloji müayinənin nəticələrindən asılı olaraq sonrakı müalicə planı müəyyənləşdiriləcək. Əgər onkoloji proses təsdiqlənərsə, pasiyentin müalicəsi onkoloqların nəzarəti altında davam etdiriləcək.