Gəncə Şəhər Birləşmiş Xəstəxanasının tabeliyindəki Uşaq xəstəxanasının həkim-oftalmoloqu Kəmalə Babayeva Aztibb.az-a bildirib ki, diaqnozun tam dəqiq qoyulması üçün bəzi prosedurlar tətbiq olunur:

“-Damlalı Müayinə (Siklopegiya): Gözə bəbəyi genəldən xüsusi damla tökülür. Bu damla astiqmatizmin dərəcəsini dəqiqliklə üzə çıxarır.

-Kompüter Müayinəsi (Avtokeratorefraktometriya): Xüsusi cihaz vasitəsilə gözün işığı sındırma qabiliyyəti və buynuz qişanın əyriliyi avtomatik ölçülür.

-Retinoskopiya: Kompüter qarşısında hərəkətsiz dayana bilməyən azyaşlı uşaqlar üçün işıq və xüsusi xətkeşlə aparılan ən effektiv obyektiv üsuldur.

-Görmə Cədvəlləri (Vizometriya): Danışa bilən uşaqların görmə faizi xüsusi şəkillər və ya hərflər olan cədvəllər vasitəsilə yoxlanılır.”

 

Həkim-oftalmoloq uşaqlarda astiqmatizm şübhəsi yaradan və müayinəyə ehtiyac olduğunu göstərən əlamətlər barədə də məlumat verib:

“Əsas əlamətləri baxarkən gözləri qıymaq və ya başı yana əymək, tez-tez təkrarlanan baş və qaşüstü ağrılar, yaxından oxuyarkən və ya televizora baxarkən tez yorulmaq, gözləri tez-tez ovuşdurmaqdır.

K. Babayeva əlavə edib ki, erkən diaqnoz gələcəkdə "tənbəl göz" (ambliopiya) riskinin qarşısını alır. Bu səbəbdən uşaqların heç bir şikayəti olmasa belə, müntəzəm olaraq 6-12 aylığında, 3 yaşında və 6 yaşında (məktəbə başlamazdan əvvəl) göz müayinəsindən keçməsi tövsiyə edilir.

 

Qeyd edək ki, astiqmatizm aşkarlandıqda, problem xüsusi eynəklər (böyük yaşlı uşaqlarda isə həmçinin kontakt linzalar) vasitəsilə uğurla korreksiya olunur.