Uşaqlarda hər ay təkrarlanan yüksək hərarət, boğazda qızartı və ağrı, ağız boşluğunda yaralar, boyun limfa vəzilərinin böyüməsi müşahidə olunursa, bu hallar sadə infeksiyadan daha fərqli ola bilər.

 

Aztibb.az-ın xəbərinə görə, belə vəziyyətlərdə PFAPA sindromu ehtimalını nəzərdən keçirmək vacibdir.

 

PFAPA – periodik qızdırma ilə müşayiət olunan və əsasən 2-5 yaş arası uşaqlarda rast gəlinən bir sindromdur. Bu hal dövri olaraq təkrarlanır və çox vaxt klassik müalicələrə cavab vermir. Məhz bu səbəbdən bir çox valideyn çaşqınlıq yaşayır və hər dəfə uşağın xəstələndiyini düşünərək antibiotiklərə müraciət edir.

 

Bu sindrom təhlükəli deyil, lakin düzgün diaqnoz qoyulmadıqda uşağın həyat keyfiyyətinə mənfi təsir edə bilər. Müvafiq müayinə və peşəkar yanaşma ilə vəziyyət tam nəzarət altına alına bilər.

Həkimlər həmçinin valideynlərə tövsiyə edir ki, bu cür əlamətləri müşahidə etdikdə, pediatra və ya uşaq revmatoloquna müraciət etsinlər.