Səhiyyə Nazirliyi Respublika QİÇS-lə Mübarizə Mərkəzi Yevlax rayonunda orta məktəblərdə "Sağlam gələcək sənin əlindədir" adlı maarifləndirmə aksiyası təşkil edib.

 

Aztibb.az-a Respublika QİÇS-lə Mübarizə Mərkəzindən verilən məlumata görə, Mərkəz tərəfindən fəaliyyət planına uyğun olaraq və “Narkotik vasitələrin, psixotrop maddələrin və onların prekursorlarının qanunsuz dövriyyəsinə, və narkomanlığa qarşı mübarizəyə dair 2026-2030-cu illər üçün Dövlət Proqramı”nın icrası ilə əlaqədar İİV/QİÇS, narkomaniya, onun fəsadları ilə bağlı maarifləndirici tədbir həyata keçirilib.

 

Respublika QİÇS-lə Mübarizə Mərkəzinin Yevlax Regional Laboratoriyasının mütəxəssisi Mətanət İmanova xüsusi hazırlanmış təqdimatla çıxış edərək İnsanın İmmunçatışmazlığı Virusu (İİV) və Qazanılmış İmmun Çatışmazlığı Sindromu (QİÇS) barədə ətraflı məlumat verib, habelə narkomaniya və onun fəsadları barədə iştirakçıları maarifləndirib.

 

Çıxış zamanı İİV infeksiyasının yoluxma yolları, ondan qorunma üsulları və müalicə imkanları barədə məlumat verilib. Gənclər sağlam həyat tərzinə üstünlük verməyə, məsuliyyətli davranmağa dəvət olunub.

 

Tədbirlər interaktiv formatda davam edib, şagirdləri maraqlandıran suallar cavablandırılıb, sonda maarifləndirici broşür və bukletlər paylanıb.