Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyi əlilliyi olan şəxslərin reabilitasiya xidmətlərinə əlçatanlığının artırılması məqsədilə yeni layihəyə  -  “RehaTransfer” nəqliyyat xidmətinin tətbiqinə başlayıb.

Bu məlumat Aztibb.az-a Agentlikdən verilib.

Bildirilib ki, bu xidmətdən reabilitasiya mərkəzlərinə sərbəst gələ bilməyən və daimi köməyə ehtiyacı olan, ilkin əlillik təyin edilmiş, eləcə də ilk dəfə reabilitasiya xidmətlərinə müraciət edən şəxslər yararlana bilərlər.

Bundan başqa, səyyar xidmət üçün müraciət edən və dəyərləndirmə nəticəsində stasionar reabilitasiya kursuna uyğun hesab edilən əlilliyi olan şəxslər də yeni xidmətdən istifadə edə biləcəklər.

Xidmətdən yararlanmaq üçün əlilliyi olan şəxslər və ya onların qanuni nümayəndələri ərazi üzrə Tibbi-Sosial Ekspert Komissiyasına müraciət edərək reabilitasiya üçün rezervasiya formalaşdırmalıdırlar.

Reabilitasiya müəssisəsi tərəfindən vətəndaşın xidmət üzrə müəyyən edilmiş hədəf qrupuna uyğunluğu təsdiqləndiyi halda “RehaTransfer” xidməti təşkil olunur.

Əlilliyi olan şəxs yaşadığı ünvandan götürülərək reabilitasiya mərkəzinə təhlükəsiz və komfortlu şəkildə çatdırılır, kurs başa çatdıqdan sonra isə onlar yenidən geri qaytarılırlar.