Səhiyyə Nazirliyi Respublika QİÇS-lə Mübarizə Mərkəzinin (RQMM) mütəxəssisləri özəl tibb müəssisəsində İİV/QİÇS, digər infeksiyalara yoluxma risklərinin idarə olunmasına dair təlim keçirib.

 

Mərkəzən Aztibb.az-a verilən məlumata görə, tədbirdə RQMM-nin təcrübəli həkimləri, klinikanın həkim və orta tibb personalı iştirak edib.

 

Təlimdə İİV/QİÇS-in müayinə və müalicəsindən bəhs olunub, İİV-in profilaktikası, diaqnostikası və müalicəsində müasir yanaşmaların əhəmiyyətinə diqqət çəkilib.

 

RQMM-in direktor müavini Ədilə Rzayeva “Azərbaycanda İİV-ə görə aparılan müayinələrin təşkili qaydaları” adlı xüsusi təqdimatla çıxış edib. Həkim dünyada və Azərbaycanda QİÇS-lə (qazanılmış immun çatışmazlığı sindromu) bağlı mövcud vəziyyət, İİV (insanın immunçatışmazlığı virusu) indikatorları, onun terapiya və müalicəsi barədə ətraflı məlumat verib. Ölkəmizdə İİV-ə nəzarətin qanunvericiliyin tələblərinə uyğun tənzimlənməsinə dair fikirlərini bölüşüb. Ə.Rzayeva Mərkəzdə İİV-ə görə aparılan müayinələrdən, qan nümunələri ilə təmas zamanı təhlükəsizlik qaydalarına necə əməl edilməsindən, tibb işçilərinin özlərini necə qorumasından və mövcud çətinliklərin aradan qaldırılmasından danışıb.

 

Tədbir iştirakçıları Günel Babayevanın “İİV/QİÇS-lə mübarizədə profilaktik tədbirlər – təmasdan öncə və sonra profilaktika”, Səbinə Nəbizadənin “Ölkəmizdə İİV/QİÇS-lə bağlı epidemioloji vəziyyət” Günel Bəbirovanın “Tibb mühitində stiqma və diskriminasiya“ mövzusunda təqdimatları maraqla dinlənyib. Azərbaycanda İİV epidemiyası ilə bağlı vəziyyət, RQMM-də İİV-ə görə aparılan müayinələr, İİV xəstəlikləri və müalicəsi, təmasdan sonra profilaktika tədbirləri, TÖP başlamazdan öncə kliniki və laborator müayinələr, İİV-lə yaşayan insanların müalicə və müayinələrə cəlb olunmasında stiqma və diskriminasiyanın yaratdığı əngəllər barədə ətraflı müzakirələr aparılıb.

 

Respublika QİÇS-lə Mübarizə Mərkəzində müayinə və müalicənin anonim, ödənişsiz qaydada icra olunduğunu vurğulayan həkimlər bildiriblər ki, əsas hədəf xəstəliyi vaxtında aşkarlamaq, onun əhali arasında yayılma riskini azaltmaq və gedişatı haqda vətəndaşları məlumatlandırmaqdır.

 

Mütəxəssislərə ünvanlanan fərdi suallar cavablandırılıb.