Normal doğuşa, adətən, hamiləlik normal gedişatlı olduqda, ananın və dölün vəziyyəti qənaətbəxş hesab edildikdə üstünlük verilir. Bu üsul əməliyyat risklərinin olmaması, daha sürətli bərpa dövrü və bəzi hallarda sonrakı hamiləliklər üçün daha az risk daşıması ilə seçilir.

 

Bu barədə Aztibb.az-a məlumat verən Xətai Tibb Mərkəzinin cərrahı, mama-ginekoloq Kifayət Əzimova bildirib ki, qeysəriyyə əməliyyatı isə müəyyən tibbi göstərişlər olduqda zəruri hesab olunur. Bunlara dölün oksigen çatışmazlığı riski, ciftin uşaqlıq boynunu örtməsi (plasenta previa), dölün qeyri-düzgün yerləşməsi (məsələn, köndələn vəziyyət), doğuş fəaliyyətinin zəifliyi, bəzi çoxdöllü hamiləliklər, əvvəlki qeysəriyyə əməliyyatından sonra yaranan risklər və anada müəyyən xəstəliklərin olması aid edilə bilər.

 

Kifayət Əzimova qeyd edib ki, hər hamiləlik fərdidir və doğuş üsulu ilə bağlı qərar həkim tərəfindən aparılan müayinələrin nəticələrinə, ananın və körpənin sağlamlıq vəziyyətinə əsasən verilir. Bu səbəbdən seçim şəxsi istəkdən daha çox tibbi göstərişlərə əsaslanmalıdır.