Salyan Rayon Mərkəzi Xəstəxanasının Cərrahiyyə şöbəsində “Mavi kod” simulyasiya təlimi keçirilib.

 

Aztibb.az-a Salyan RMX-dan bildirilib ki, təlimdə xəstəxananın Keyfiyyətə Nəzarətin İdarə Edilməsi Komitəsinin rəhbəri Yusif Muradov komanda üzvlərinə sınaq məşqinin gedişatını izah edib və müvafiq tapşırıqları verib. Daha sonra Cərrahiyyə şöbəsində “Mavi kod” siqnalı işə salınıb.

 

Qeyd edək ki, “Mavi kod” xəstəxanada qəfil ürək və ya tənəffüs dayanması zamanı tibbi heyətin ən qısa müddətdə hadisə yerinə yetişməsini və xəstəyə operativ müdaxilə etməsini təmin edən təcili bildiriş sistemidir.

 

Simulyasiya zamanı şöbədə müalicə alan şərti xəstənin vəziyyətinin qəfil pisləşdiyini görən tibb bacısı dərhal onun nəbzini yoxlayıb. Nəbzin dayandığını müəyyən etdikdən sonra o, dərhal “Mavi kod” elan edib. Xüsusi komanda hadisə yerinə çatana qədər böyük tibb bacısı xəstəyə ilkin təməl həyat dəstəyi göstərib. Daha sonra əraziyə yetişən həkim vəziyyəti nəzarətə götürərək təkmil reanimasiya tədbirlərinə başlayıb. Həyata keçirilən operativ müdaxilə nəticəsində vəziyyəti stabilləşən xəstə Reanimasiya şöbəsinə köçürülüb.

 

Sonda təlim uğurla başa çatıb və personalı maraqlandıran suallar cavablandırılıb.