Gürcüstanın Tbilisi şəhərində keçirilən “Surgical Spring 2026” beynəlxalq elmi-praktik konfransında Bakı Sağlamlıq Mərkəzinin həkimləri iştirak ediblər.

 

Mərkəzdən Aztibb.az-a bildirilib ki, cərrahi ginekologiyanın aktual mövzularını əhatə edən tədbir müxtəlif ölkələrdən tanınmış mütəxəssisləri bir araya gətirib.

Konfrans çərçivəsində Bakı Sağlamlıq Mərkəzinin professoru İslam Mahalov “Marousa və Yabuki anatomik sahələri və onların xoşxassəli ginekoloji patologiyaların cərrahi müalicəsində əhəmiyyəti” mövzusunda elmi məruzə ilə çıxış edib. Professor İslam Mahalov, həmçinin konfransın elmi sessiyalarından birinə moderatorluq edib.

 

Bakı Sağlamlıq Mərkəzinin mama-ginekoloqu Nərgiz Nağıyeva isə “Keçirilmiş keysəriyyə əməliyyatı olan pasiyentlərdə sidik kisəsinin endometriozu” mövzusunda təqdimatla çıxış edərək öz təcrübəsini həmkarları ilə bölüşüb.

 

Beynəlxalq səviyyəli mütəxəssislərin iştirak etdiyi tədbir yeni elmi biliklərin paylaşılması, peşəkar təcrübə mübadiləsi və beynəlxalq əməkdaşlığın genişləndirilməsi baxımından mühüm əhəmiyyət daşıyıb.