Azərbaycan Tibb Universitetinin (ATU) tələbələri Bakıda keçirilən BMT-nin Ümumdünya Şəhərsalma Forumunun 13-cü Sessiyasında (WUF13) könüllü kimi fəal iştirak ediblər.

ATU-dan Aztibb.az-a verilən xəbərə görə, üniversitetin Müalicə-profilaktika, Stomatologiya, Əczaçılıq və İctimai səhiyyə fakültələrinin tələbələrii qlobal tədbirdə “First Aid”, “Dispeçer”, “Medical Data Operator” və “Medical Supply Team” kimi müxtəlif istiqamətlər üzrə fəaliyyət göstərərək forumun təşkilati və tibbi dəstək işlərinə töhfə veriblər.

Bununla yanaşı, ATU Tələbə Həmkarlar İttifaqı Komitəsinin aktiv nümayəndələri də həm komanda üzvü, həm də könüllü qismində tədbirdə iştirak edərək yüksək təşkilatçılıq və operativlik nümayiş etdiriblər. WUF13 çərçivəsində gənclərin beynəlxalq tədbirdə iştirakı onların peşəkar inkişafı və praktiki təcrübə qazanması baxımından da mühüm əhəmiyyət daşıyıb.

Ümumdünya Şəhərsalma Forumu müasir dünyanın üzləşdiyi ən aktual məsələlərdən birini – sürətli şəhərsalmanı və onun icmalar, şəhərlər, ölkələr, iqlim dəyişməsi və siyasi kurslara təsirini araşdırmaq məqsədilə 2001‑ci ildə Birləşmiş Millətlər Təşkilatı tərəfindən təsis edilib.

BMT‑nin Məskunlaşma Proqramı (UN‑Habitat) tərəfindən təşkil olunan bu Forum dayanıqlı şəhərsalma problemlərinin həllinə həsr olunmuş yüksək səviyyəli, açıq və inklüziv platformadır. “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri’ mövzusuna həsr olunmuş WUF13 qlobal mənzil çağırışlarını ön plana çəkərək mənzil təminatını inklüzivlik və davamlılığın əsas amili kimi araşdırır və Yeni Şəhər Gündəliyinin icrasının formalaşdırılmasına töhfə verir.