61 yaşlı Reyhan Pənəyeva Mərkəzi Gömrük Hospitalına müraciət edib.

 

Hospitaldan Aztib.az-a bildirilib ki, aprelin 9-da pasiyentin üzərindən yük avtomobili keçib və o, çoxsaylı travmalar alıb. Xəstə ilkin olaraq başqa tibb müəssisəsində müalicə olunmuş, orada sağ dirsək oynağının tam çıxığı qapalı reduksiya edilib.

 

13 aprel tarixində pasiyent müalicəsini davam etdirmək üçün Mərkəzi Gömrük Hospitalına müraciət edib. Qəbul zamanı sağ dirsək oynağının immobilizasiya vəziyyəti (sarğı/asqı ilə), qapalı reduksiyadan sonrakı vəziyyət, sol topuq oynağının oynaqdaxili yerdəyişmiş qapalı sınığı, sağ bud sümüyünün distal hissəsinin çoxparçalı açıq sınığı, həmçinin bud və baldır nahiyəsində yumşaq toxumaların əzilməsi qeydə alınıb. Daha sonra pasiyent Təcili tibbi yardım şöbəsinə, oradan isə Reanimasiya şöbəsinə yerləşdirilib.

 

14 aprel tarixində pasiyent Ramin Rzayev tərəfindən əməliyyata alınıb. Sağ bud sümüyünün xarici fiksatorlarla osteosintezi, bud və baldır nahiyələrində yaraların yuyulması və drenaj olunması icra edilib. 17 aprel tarixində sol topuq oynağında medial malleolun qapalı osteosintezi əməliyyatı həyata keçirilib. Reanimasiya şöbəsində aparılan müalicədən sonra pasiyentin vəziyyəti stabilləşib və 20.04.2026-cı il tarixində stasionar şöbəyə köçürülüb.

 

6 may 2026-cı il tarixində pasiyentdə sağ bud və baldır nahiyələrində yaranmış nekrotik dəri və yumşaq toxumaların tam təmizlənməsi (nekrektomiya) icra olunub. Hazırda pasiyentin vəziyyəti stabildir, yaralar təmiz və sakitdir, laborator göstəriciləri və bədən hərarəti normadadır. Müalicənin növbəti mərhələsinin ambulator və ev şəraitində davam etdirilməsi planlaşdırılır.