Səhiyyə Nazirliyinin K.Y. Fərəcova adına Elmi-Tədqiqat Pediatriya İnstitutuna ağır vəziyyətdə daxil olan iki azyaşlıya vaxtında və peşəkar tibbi yardım göstərilib.

 

İnstitutdan Aztibb.az-a verilən məlumata görə, 2 saylı Körpələr Evindən təcili tibbi yardım vasitəsilə İnstitutun Somatika şöbəsinə gətirilən bir yaşlı azyaşlının vəziyyəti daxil olan zaman çox ağır olub. Kəskin tənəffüs çatışmazlığı və yüksək hərarət qeydə alınan körpəyə dərhal oksigenlə respirator dəstək başlanılıb, intensiv müalicə tədbirləri həyata keçirilib.

 

İnstitutun həkimləri tərəfindən aparılan 14 günlük stasionar müalicə və nəzarətdən sonra azyaşlının vəziyyəti yaxşılaşıb və körpə yenidən 2 saylı Körpələr Evinə göndərilib.

 

Eyni zamanda, 1 saylı Körpələr Evindən hospitalizasiya olunan 5 aylıq digər azyaşlı da institutun Yenidoğulmuşların patologiyası şöbəsində müalicə alıb. Həkimlər tərəfindən həyata keçirilən müalicə tədbirləri nəticəsində körpənin vəziyyəti stabilləşib, müsbət dinamika müşahidə olunub.

 

Azyaşlı xəstəxananın nəqliyyat vasitəsi və tibb personalının müşayiəti ilə təhlükəsiz şəkildə 1 saylı Körpələr Evinə təhvil verilib.

 

Həkimlərimizin peşəkarlığı, operativ müdaxiləsi və qayğıkeş yanaşması nəticəsində hər iki azyaşlının sağlamlığında müsbət nəticə əldə olunub.