Onurğaarası yırtıqlar yaş artdıqca insanlarda tez-tez meydana çıxır və onurğada baş verən dəyişikliklərin təbii nəticəsi hesab olunur. Lakin bu diaqnozun olması hər zaman ağrı ilə müşayiət olunmur.

Aztibb.az xəbər verir ki, bu barədə nevroloq Natalya Suvorinova “Pravda" nəşrinə müsahibəsində danışıb.

Mütəxəssisin sözlərinə görə, zaman keçdikcə qığırdaq toxuması onurğaya düşən davamlı yük səbəbindən tədricən nazikləşir. Nəticədə onurğanın müxtəlif hissələrində fəqərəarası disklərin kiçik çıxıntıları yarana bilər. Həkim vurğulayıb ki, bu cür dəyişikliklər insanların əksəriyyətində müşahidə olunur və çox vaxt ümumi sağlamlıq vəziyyətinə heç bir təsir göstərmir.

Nevroloq qeyd edib ki, ağrı sindromu və digər şikayətlər olmadıqda, adətən xüsusi müayinə və ya müalicəyə ehtiyac yaranmır. Onun sözlərinə görə, simptomsuz gizli yırtıqların axtarılması fayda vermir və yalnız əlavə narahatlıq yarada bilər.

Ekspert əlavə edib ki, cərrahi müdaxilə yalnız ağır hallarda — məsələn, yırtıq onurğa beynini sıxmağa başladıqda tələb olunur. Bu vəziyyət güclü ağrı, əl və ayaqlarda zəiflik, eləcə də digər ciddi nevroloji əlamətlərlə özünü göstərə bilər.

Profilaktika məqsədilə həkim fiziki aktivliyin qorunmasını və əzələ korsetinin gücləndirilməsini tövsiyə edib. Onun sözlərinə görə, inkişaf etmiş əzələlər onurğaya düşən yükü azaldır və onurğaarası yırtıqlarla bağlı ağırlaşmalar riskini minimuma endirir.