İnsan günəş işığı olmadan yaşaya bilər. Lakin bir ay qaranlıq şəraitdə qalmaq artıq yaddaş keyfiyyətini, sümük toxumasını zəiflədir və narahatlıq səviyyəsini artırır.

Aztibb.az xəbər verir ki, bu barədə TASS-a Perm Milli Tədqiqat Politexnik Universitetinin “Kimya və biotexnologiya” kafedrasının baş elmi işçisi, tibb elmləri namizədi Valeri Litvinov məlumat verib.

Mütəxəssisin sözlərinə görə, gün işığının olmaması insanın həm psixoloji, həm də fiziki sağlamlığına mənfi təsir göstərir. Burada əsas rol bioloji ritmlərə məxsusdur. Gündüz-gecə dövrləri pozulduqda melatonin və kortizol hormonlarının ifrazı balansdan çıxır. Bu isə yuxusuzluğa, gündüz yuxululuğuna və immunitetin zəifləməsinə səbəb olur.

Təxminən bir ayın sonunda əksər insanlarda depressiv əhval-ruhiyyə, narahatlıq, yaddaş və diqqət pozuntuları yaranır. Bundan əlavə, uzunmüddətli günəş işığı çatışmazlığı D vitamini defisitinə gətirib çıxarır ki, bu da sümükləri və immun sistemini zəiflədir, həmçinin dəri və yoluxucu xəstəliklərin riskini artırır.

Mütəxəssis əlavə edir ki, əgər insanın psixoloji vəziyyəti əvvəldən sabit deyilsə, bir ay qaranlıqda qalmaq demək olar ki, qaçılmaz şəkildə depressiyaya səbəb olur. Orqanizmin D vitamini sintez etməsi və ümumi tonusun qorunması üçün gündə ən az 30–60 dəqiqə gün işığında olmaq tövsiyə edilir, xüsusilə günün birinci yarısında. Həmçinin yaşayış və iş mühitində təbii işıq çatışmazlığının davamlı olmasına yol verilməməlidir.