Optik eynək xəstəyə mütləq şəkildə mütəxəssis tərəfindən təyin olunmalıdır.

Aztibb.az-ın xəbərinə görə, bəzən insanlar optik eynək seçimində mütəxəssis həkimlə məsləhətləşmir, sadəcə optik eynəklər satılan yerlərdən görünüşcə bəyəndikləri hazır eynəkləri alırlar. Bu cür eynəklərdə hər iki şüşənin dərəcəsi eyni olur. Amma əgər şəxsdə gözlərin görmə zəifliyi fərqlidirsə, bu cür eynəklər görmə zəifliyinin artmasına, göz və baş ağrılarına səbəb ola bilər. Bir sözlə, optik eynək seçimində verilmiş özbaşına qərar əksinə sağlamlığımıza mənfi təsir göstərə bilər. Bütün hallarda eynək xəstəyə mütləq şəkildə mütəxəssis tərəfindən təyin olunmalıdır.

Optik eynək alarkən keyfiyyət sənədinin olması məqsədəuyğundur. Çünki həmin keyfiyyət sənədində şüşənin materialı, eynəyin gözləri ultrabənövşəyi şüalardan nə dərəcədə qoruması haqqında məlumat olur. Eynək alarkən eynəyin çəkisinə, rənginə də fikir verilməlidir. Belə ki, eynəyin çəkisi yüngül olduqda, həm burun sümüklərinə, həm də qulağın arxası nahiyəsinə daha az təzyiq etmiş olur. Uzaqdan görmə eynəklərinin çərçivəsinin daha böyük, yaxından görmə eynəklərinin isə daha ensiz olması da istifadəni asanlaşdırır. Keyfiyyətsiz eynək istifadəsi gözdə quruluğa, gözlərin sulanmasına, kataraktaya səbəb ola bilər, eynəyin şüşəsi çox tünd olduqda isə bəbəyin genəlməsinə, büllurun bulanmasına, görmə zəifliyinə səbəb ola bilər.