Sabunçu Tibb Mərkəzində Azərbaycan xalqının Ümummilli Lideri, Ulu Öndər Heydər Əliyevin anadan olmasının 103-cü ildönümü münasibətilə tədbir keçirilib.

Mərkəzdən Aztibb.az-a verilən məlumata görə, tədbir Azərbaycan Respublikasının Dövlət Himninin səsləndirilməsi ilə başlayıb.

Daha sonra müasir Azərbaycanın qurucusu və memarı, dövlətçilik tariximizdə silinməz iz qoymuş Heydər Əliyevin əziz xatirəsi, eləcə də Vətən uğrunda canlarından keçmiş bütün şəhidlərimizin ruhu bir dəqiqəlik sükutla yad edilib.

Ardınca Ulu Öndərin həyat və fəaliyyətindən bəhs edən videoçarx nümayiş olunub.

Tədbirdə Sabunçu Tibb Mərkəzinin direktor səlahiyyətlərini icra edən Sevinc Həsənzadə çıxış edərək Heydər Əliyevin şərəfli ömür yolundan bəhs edib.

Mərkəzin cərrahi işlər üzrə direktor müavini Kamil Hacıyev, 2 nömrəli Doğum evinin rəhbəri, direktor müavini Səadət Şamilova, 7 saylı Maştağa xəstəxanasının rəhbəri, direktor müavini Namiq Nəbiyev, eləcə də Ürologiya şöbəsinin müdiri İlqar İsmayılov çıxış edərək Ulu Öndərin həyat və fəaliyyətindən, xalqımıza və dövlətimizə göstərdiyi misilsiz xidmətlərdən danışıblar.

Çıxışlarda vurğulanıb ki, Heydər Əliyevin müəyyən etdiyi inkişaf strategiyası bu gün də ölkəmizin bütün sahələrində, o cümlədən səhiyyə sistemində uğurla davam etdirilir. Onun səhiyyəyə göstərdiyi diqqət və qayğı bu sahənin inkişafında mühüm rol oynayıb.

Tədbir çərçivəsində Ulu Öndərin zəngin irsi bir daha xatırlanıb, Azərbaycan xalqı qarşısındakı əvəzsiz xidmətləri xüsusi vurğulanıb.