Tədris Cərrahiyyə Klinikasının ümumi cərrahiyyə şöbəsinin professoru Rüstəm Məmmədov mədədə aşkar olunan törəmə ilə bağlı aparılan cərrahi müdaxilə barədə Aztibb.az-a məlumat verib.

Həkim bildirib ki, 65 yaşlı xəstə klinikaya ürəkbulanma, qusma, qəbul etdiyi qidanın səhər saatlarında geri qaytarılması, eləcə də nəcisdə qara rəngli dəyişiklik və təkrarlayan “kofe çöküntülü” qusma şikayətləri ilə müraciət edib. Aparılan qastroskopiya müayinəsi zamanı mədənin pilorantral hissəsində törəmə aşkar edilib. Daha sonra kompüter tomoqrafiyası və histoloji müayinələr nəticəsində diaqnoz təsdiqlənib.

Məlumata görə, hazırda xəstə cərrahi əməliyyata götürülüb və artıq laparotomiya icra olunub. Törəmənin yerləşdiyi nahiyə nəzərə alınaraq mədənin tam çıxarılmasına ehtiyac olmadığı, subtotal qastrektomiya və D2 limfodisseksiya əməliyyatının aparılacağı bildirilib.

Həkimin sözlərinə görə, bu tip mədə törəmələrinə praktikada kifayət qədər tez-tez rast gəlinir və onların yaranmasında qidalanma vərdişləri, genetik faktorlar, zərərli vərdişlər, eləcə də immun və nevroloji vəziyyət mühüm rol oynaya bilər.