Azərbaycan Respublikası Dövlət Gömrük Komitəsində könüllülük hərəkatının inkişafı çərçivəsində yaradılan 17-ci “Könüllü gömrükçü” dəstəsinin 20 üzvü üç ay müddətinə Dövlət Gömrük Komitəsinin Tibbi Xidmət İdarəsinin və Mərkəzi Gömrük Hospitalının müvafiq şöbələrində fəaliyyətə başlayıb.

Gömrük Hospitalından Aztibb.az-a bildirilib ki, Dövlət Gömrük Komitəsinin Tibbi Xidmət İdarəsində və Hospitalda çalışacaq könüllü gömrükçü dəstəsinin üzvləri ilə görüş keçirilib.

Görüşdə Azərbaycan Respublikası Dövlət Gömrük Komitəsi Tibbi Xidmət İdarəsinin rəis müavini Şahlar Mirqasım və Mərkəzi Gömrük Hospitalının rəis müavini Nahidə Mahmudova və könüllü gömrükçülər iştirak ediblər.

Dövlət Gömrük Komitəsi Tibbi Xidmət İdarəsinin rəis müavini Şahlar Mirqasım çıxışında qeyd edib ki, könüllülük fəaliyyəti gənclərin peşəkar inkişafında mühüm rol oynamaqla yanaşı, onların sosial məsuliyyət hissinin formalaşmasına da ciddi töhfə verir. Rəis müavini Şahlar Mirqasım vurğulayıb ki, xüsusilə səhiyyə sahəsində həyata keçirilən könüllülük fəaliyyəti iştirakçılara real iş mühitində təcrübə qazanmaq, tibbi xidmətlərin təşkili ilə yaxından tanış olmaq və komandada işləmək bacarıqlarını inkişaf etdirmək imkanı yaradır. Rəis müavini Şahlar Mirqasım könüllülərə fəaliyyət dövründə məsuliyyətli, təşəbbüskar və öyrənməyə açıq olmalarını tövsiyə edərək, onların gələcək karyeralarında bu təcrübənin mühüm rol oynayacağına əminliyini ifadə edib.

Daha sonra Mərkəzi Gömrük Hospitalının rəis müavini Nahidə Mahmudova çıxış edərək könüllü gömrükçüləri salamlayıb, onların səhiyyə sistemində fəaliyyət göstərməsinin həm peşəkar biliklərinin, həm də insanlarla ünsiyyət bacarıqlarının inkişafı baxımından əhəmiyyətini qeyd edib.

Görüş interaktiv müzakirələr şəraitində davam edib, könüllüləri maraqlandıran suallar cavablandırılıb və onlara fəaliyyət müddəti ilə bağlı ətraflı məlumat verilib. Tədbirin sonunda könüllü gömrükçülərə uğurlar arzulanıb və onların bu məsuliyyətli missiyanı layiqincə yerinə yetirəcəklərinə inam ifadə olunub.