Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Bakı şəhəri 222 və 279 nömrəli tam orta məktəblərdə pedaqoji heyət üçün sağlam həyat tərzi və sağlam qidalanma üzrə maarifləndirici təlimlər keçirilib.

Aztibb.az-a Mərkəzdən verilən xəbərə görə, təlimlərin məqsədi qeyri-infeksion xəstəliklərin əsas risk amilləri, zərərli vərdişlərin mənfi təsirləri və sağlam qidalanma barədə məlumatlılığın artırılması olub. 

İSİM-in Səhiyyə kommunikasiyası şöbəsinin müdiri Laura Quliyeva geniş təqdimatla çıxış edərək, qeyri-sağlam qidalanmanın fiziki fəaliyyət və təhsil göstəricilərinə mənfi təsirləri, gənc nəsildə sağlam davranış modellərinin erkən yaş dövründən formalaşdırılmasının əhəmiyyəti barədə ətraflı məlumat verib. Uşaqların düzgün istiqamətləndirilməsində təhsil işçilərinin müstəsna roluna dair sübutlu mənbələrə əsaslanan tövsiyələri diqqətə çatdırıb.

O, İSİM tərəfindən müəllimlər, şagirdlər və valideynlər üçün hazırlanaraq istifadəyə verilən “Sağlam uşaq” portalı və mobil tətbiqi barədə iştirakçıları məlumatlandıraraq, portalda sağlamlığın qorunması, sağlam həyat tərzi, sağlam qidalanmaya dair müxtəlif çeşiddə məlumatların yer aldığını bildirib. Eyni zamanda, İSİM tərəfindən uşaqlar, müəllimlər və valideynlər üçün hazırlanaraq nəşr edilən “Məktəblinin sağlamlığı” kitabları, eləcə də digər vəsaitlər təhsil işçilərinə təqdim olunub
Diskusiya formatında keçirilən seminarlarda müəllimlərin sualları cavablandırılıb, təhsil mühitində sağlam həyat tərzinin təşviqi və şagirdlərə sağlam davranış modellərinin aşılanması istiqamətində innovativ metodikaların tətbiqi, məlumatlardan sübutlu mənbələrə istinadən istifadənin zəruriliyi vurğulanıb.
Sonda təhsil müəssisələrinə İSİM tərəfindən hazırlanaraq nəşr edilən geniş çeşiddə maarifləndirmə materialları təqdim olunub.