Ümumdünya Səhiyyə Təşkilatı (ÜST) çərşənbə axşamı bildirib ki, yeni hepatit B infeksiyalarının illik sayı qlobal miqyasda 32 faiz, hepatit C ilə əlaqəli ölümlər isə 12 faiz azalıb. Təşkilat əlavə edib ki, bu irəliləyiş əhəmiyyətlidir, lakin xəstəliyi aradan qaldırma məqsədlərinə çatmaq üçün qeyri-kafidir.

Aztibb.az AZƏRTAC-a istinadla xəbər verir ki, infeksiyaların azalması davamlı qlobal səyləri əks etdirir, baxmayaraq ki, viruslu hepatit 2024-cü ildə hələ də 1,34 milyon ölümə səbəb olub və hər il 1,8 milyon insana yoluxmağa davam edir.

ÜST-nin Baş direktoru Tedros Adhanom Gebreyesus bildirib: “Dünyanın hər yerindəki ölkələrdən daxil olan məlumatlar göstərir ki, hepatiti aradan qaldırmaq xəyal deyil, bu, etibarlı daxili maliyyələşdirmə ilə dəstəklənən davamlı siyasi öhdəliklə mümkündür”. O, eyni zamanda, irəliləyişin çox yavaş və qeyri-bərabər olduğunu əlavə edib.

Hesabatda, həmçinin beş yaşdan kiçik uşaqlar arasında hepatit B virusunun yayılmasının 0,6 faizə düşdüyü, 85 ölkənin 2030-cu il üçün 0,1 faiz hədəfinə çatdığı və ya onu keçdiyi bildirilir.

ÜST 2024-cü ildə 287 milyon insanın xroniki hepatit B və ya C infeksiyaları ilə yaşadığını bildirib, müalicədəki boşluqlar isə ciddi olaraq qalır və hazırda xroniki hepatit B xəstələrinin 5 faizindən az hissəsi müalicə alır.

“Məlumatlar irəliləyişin mümkün olduğunu göstərir, amma mövcud problemləri də nümayiş etdirir”, -deyə ÜST-nin HİV, vərəm, hepatit və cinsi yolla keçən infeksiyalar Departamentinin direktoru Tereza Kasayeva bildirib.

BMT-nin səhiyyə agentliyi 2030-cu il hədəflərinə çatmaq üçün profilaktikanın, testlərin və müalicənin daha sürətli genişləndirilməsinə çağırıb.