Vaxtından əvvəl, 1000 qram çəkidə doğulan körpə özəl tibb müəssisəsində süni tənəffüs aparatına qoşulub və reanimasiya şöbəsində müalicə alıb. Körpə həmin xəstəxanada təxminən 25 gün ərzində tənəffüs dəstəyində qalıb. Aparılan müayinələr zamanı uşağın baş beynində mədəcikdaxili 3-cü dərəcəli qansızma aşkar edilib. Sonrakı müşahidələrdə bu qansızmanın sorulduğu qeyd olunub.

 

Bu barədə Aztibb.az-a Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutundan məlumat verilib.

 

Bildirilib ki, daha sonra baş beynində hidrosefaliya qeydə alınıb. Uşaq 25 gündən sonra süni tənəffüs aparatdan ayrılaraq evə buraxılsa da, 1–2 saat sonra vəziyyəti kəskin pisləşib, tənəffüs çatışmazlığı yaranıb və Elmi-Tədqiqat Pediatriya İnstitutuna gətirilib.

 

Körpə dərhal Yenidoğulmuşların reanimasiya və intensiv terapiya şöbəsinə yerləşdirilib və yenidən süni tənəffüs aparatına qoşulub 50 gün respirator dəstək davam edib. Bu dövr ərzində vəziyyəti qeyri-stabil olaraq qalıb və aparatdan ayrılması çətin olub. Həkim reanimatoloq Rəna Məmmədova tərəfindən aparılan intensiv müalicə və daimi nəzarət nəticəsində körpənin vəziyyətində müsbət dinamika müşahidə olunub, çəkisi tədricən artaraq hazırda 3110 qrama çatıb. Vəziyyəti stabilləşdikdən sonra Vaxtından əvvəl doğulmuşların patologiyası şöbəsinə yerləşdirilib. Ümumilikdə, körpə 2 aya yaxın müddətdə stasionar şəraitdə müalicə alıb.

 

Valideynlər göstərilən diqqət, qayğı və peşəkarlığa görə institutun direktoruna, Yenidoğulmuşların reanimasiya və intensiv terapiya şöbəsinin həkimlərinə və bütün tibb heyətinə dərin minnətdarlıqlarını bildiriblər.