Səhiyyə Nazirliyinin İctimai Səhiyyə və İslahatlar Mərkəzi (İSİM) və Ailə, Qadın və Uşaq Problemləri üzrə Dövlət Komitəsinin birgə təşəbbüsü ilə 2 nömrəli Bakı Baza Tibb Kollecində “Uşaqların doğulanadək cins seçiminə yox deyək!” mövzusunda maarifləndirici tədbir keçirilib.

İsiM-dən Aztibb.az-a verilən məlumata görə, tədbirdə çıxış edən Ailə, Qadın və Uşaq Problemləri üzrə Dövlət Komitəsinin Ailə məsələləri şöbəsinin müdir müavini Kamila Əliyeva selektiv abortların ölkənin demoqrafik dayanıqlılığı üçün doğurduğu risklər, bu istiqamətdə həyata keçirilən dövlət siyasəti və mövcud beynəlxalq təcrübə barədə gəncləri məlumatlandırıb.

İSİM-in Monitorinq və təhlil şöbəsinin müdir müavini Zümrüd Kazımova ailə planlaşdırılmasının düzgün qurulması, ana və uşaq sağlamlığının qorunması, eləcə də hamiləliyin süni şəkildə sonlandırılmasının qadın sağlamlığı üçün yaratdığı risklər barədə danışıb. O həmçinin, gələcəyin tibb mütəxəssisləri olan tələbələrin bu sahədə dərin biliklərə sahib olmasının, gələcəkdə əhali arasında maarifləndirmə və effektiv təbliğat strategiyalarının qurulmasında həlledici rol oynayacağını xüsusi vurğulayıb.

Yekunda iştirakçıları maraqlandıran suallar cavablandırılıb və onlara İSİM tərəfindən hazırlanaraq çap edilən maarifləndirici materiallar təqdim edilib.