Əziz Əliyev adına Naxçıvan MR Uşaq Xəstəxanasında Təcili Tibbi Yardım Bölməsi yenidən qurulub

28.06.2024 09:56

Əziz Əliyev adına Naxçıvan Muxtar Respublikası Uşaq Xəstəxanasında Təcili Tibbi Yardım Bölməsi yenidən qurulub.

Aztibb.az-a Naxçıvan MR Səhiyyə Nazirliyindən verilən məlumata görə, bölmə funksional çarpayılar, xəstəbaşı monitorlar, infuzomatlar və perfuziya aparatları ilə təmin edilib. Bölmədə xəstələrin yaşıl, sarı və qırmızı sahələr üzrə triaj sistemi tətbiq edilir.

Məqsəd Təcili Tibbi Yardım Bölməsində xəstələrin vəziyyətlərinin ağırlıq dərəcələrinə görə çeşidlənməsinin, onlara sürətli, effektiv və keyfiyyətli tibbi yardımın göstərilməsinin təmin edilməsidir.

Triaj (tibbi çeşidləmə)- çox sayda xəstə və yaralının olduğu hallarda, təcililik, təxirəsalınmazlıq və ağırlıq dərəcələrinə uyğun olaraq, müalicə və köçürülmə üçün pasiyentlərin prioritet növbəsini müəyyən etmək məqsədilə aparılan sürətli seçmə və kodlama prosesidir.

TTYB-nin işi pasiyentin qəbulu ilə başlayaraq aşağıdakı mərhələlər üzrə icra olunur:

Xəstənin pasport məlumatlarının toplanılması;

Triaj mərhələsi;

Müayinə;

Təyinat;

Tibbi bacısının müşahidə qeydləri;

Xəstənin vəziyyətinin dinamikasının qiymətləndirilməsi;

Konsultasiya;

Çıxış qeydləri/Nəticə;

Göstəriş/Sonrakı müalicə və müayinəyə dair verilmiş məsləhət.

Triaj zamanı rəng kodlaması:

Xəstələr qırmızı, sarı və yaşıl sahələr üzrə çeşidlənir və daha sonra xəstəyə müvafiq rəngə uyğun Təcili Tibbi Yardım sahəsində Yardım göstərilir.

Qırmızı(təxirəsalınmaz)-qırmızı kodlu xəstələrə 10 dəqiqə ərzində qırmızı sahədə təxirəsalınmaz tibbi yardım göstərilir, daha sonra onlar müvafiq şöbəyə köçürülürlər.

Sarı(təcili)-sarı kodlu xəstələrə 60 dəqiqədən gec olmayaraq sarı sahədə tibbi yardım göstərilir daha sonra onlar 8 saatdan çox olmayaraq müşahidə altında saxlanılır. Daha çox müşahidə altında saxlanılmalı olan, yaxud stasionar xidmətə ehtiyyacı olan xəstələr müvafiq şöbələrə köçürülürlər.

Yaşıl(təcili olmayan)-yaşıl kodlu xəstələrə 1-4 saat ərzində yaşıl sahədə xidmət göstərilir, daha sonra onlara ambulator və ya stasionar müalicə almalarına dair tövsiyələr verilir.