Azərbaycan Tibb Universitetinin (ATU) I Cərrahi xəstəliklər kafedrasının əməkdaşı, Bariatrik və Metabolik Cərrahlar Assosiasiyasının sədri, t.ü.f.d. Taryel Ömərovun həmmüəllifi olduğu elmi məqalə nüfuzlu beynəlxalq yayım şəbəkələrində dərc olunub.
Aztibb.az-a ATU-dan verilən xəbərə görə, nəşr edilən "Global 30-Day Morbidity and Mortality of Primary Bariatric Surgery Combined with Another Procedure" protokol məqaləsi üzərində 2 il ərzində 162 cərrah birgə işləyib. Müəlliflər 32 dövlətdən olan 75 böyük elmi mərkəzi təmsil ediblər. Bunlar arasında Azərbaycan Tibb Universitetinin I cərrahi xəstəliklər kafedrası, Azərbaycan Bariatrik və Metabolik Cərrahlar Dərnəyi də olub.
Qeyd edək ki, T.Ömərovun elmi məqalələri, 2010-cu ildən etibarən Springer, Elcevier, Nature beynəlxalq yayım şəbəkələrində dərc olunmaqdadır. Lakin beynəlxalq elmi işçi qruplarının, multidissiplinar çoxmərkəzli tədqiqatların aparılmasına 2017-ci ildən etibatən start verilib. Yuxarıda qeyd edilən tədqiqat isə azərbaycanlı tibb mütəxəssislərinin elm sahəsində növbəti uğurudur.
