Ramazandan sonra düzgün və sağlam qidalanmağın yolları haqqında Mingəçevir Şəhər Mərkəzi Xəstəxanasının həkim-terapevti Kifayət Həsənova Aztibb.az-a məlumat verib.

 

Həkim bildirib ki, müqəddəs ayda oruc tutan bütün müsəlmanlar üçün Ramazan bayramı xüsusi önəmlidir. Bayram süfrələri bol və müxtəlif çeşiddə yeməklər, şirniyyatlarla dolu olur. Bu yeməklərin bir ay boyunca dincələn orqanizmə fəsadları da çox olur.

 

Onun sözlərinə görə, Ramazandan sonra ən önəmli məqamlardan biri maddələr mübadiləsinin sürətlənməsidir: Çünki ramazan ayında cəmi iki dəfə qıdalandığımız üçün arada 15 saatlıq bir zaman dönəmində orqanizm qoruma mexanizmində çalışır, maddələr mübadiləsi zəifləyir: "Bəzi insanlar ramazan ayında iftar zamanı aşırı qida qəbul etməyə meyilli olurlar. Ramazandan sonra ilk rastlaşdıqları problem, artıq çəkidir. Artıq çəki insan bədənində ürək-damar, hipertoniya, insult, mədə-bağırsaq sistemi xəstəlikləri riskini artırır. Çünki, uzun müddət boş qalmış mədəni aşırı yükləyirlər”.

 

K.Həsənova qeyd edib ki, Ramazan süfrəsidə şirniyatın qəbulu artıq kalori və mədə-bağırsaq sistemini yükləyir. Seçim edərkən südlü, ağır şirniyyatlara üstünlük verməsinlər. Bayram süfrəsində yeyə biləcəklərindən artıq qida olmasın. Oruc tutan insanlar ilk öncə şirniyyat təklifini geri çevirməyi bacarmalıdır:

 

"Ramazanda iki dəfə qidalanırdılarsa, Ramazandan sonra bunu 5-6 yerə bölmək lazımdır. Yəni az-az, tez-tez qidalanmaq daha yaxşı olar. Ara yeməklərdə mütləq süd məhsulları olmalıdır. Qatıq, ayran, meyvə, az miqdarda çərəz. Bol yağda bişən yeməklərdən uzaq durmaq lazımdır. Qidaların bişirilmə yöntəmi önəmlidir. Yeməklər daha çox soyutma tipli olsa, daha məqsədəuyğun olar. Yağda qızardılmış qidalardan uzaq durmaq lazımdır”.

 

Həkimin fikirlərinə görə, fiziki aktivliyə xüsusi diqqət yetirməkdə fayda var. İftar gec saatlarda olduğuna görə, faktiki olaraq bədən hərəkətsiz qalır. Buna görə hər gün 30-45 dəqiqə arası tempolu yürüyüşlə, rəqslə məşğul olmaq lazımdır. Bol su qəbulu məsləhətdir. Yeməkdən yarım saat öncə və yarım saat sonra olmaq şərti ilə 8-10 stəkan su içmək lazımdır. Beləliklə də ramazandan sonrakı müddətdə maddələr mübadiləsi əvvəlki normal vəziyyətinə qayıda bilsin. Bu məsləhətlərə əməl olunduğu təqdirdə, artıq çəki almadığınız halda xəstəliklərə yaxalanma riski də azalır.