Ateroma dəri piy vəzisinin xoşxassəli şişidir. Xəstəliyin əsas səbəbi piy axarlarının tıxaclanmasıdır.

Aztibb.az xəbər verir ki, ümumi cərrah Toğrul Məhərrəmovun bildirdiyinə görə, ateromaya dərinin ən çox piyli hissəsində rast gəlmək olur.

Ən çox üzdə, göz ətrafında, kürək və qarın, baş nahiyəsində rast gəlinir. Şiş toxuması tək və ya çoxlu miqdar yan-yana düzülmüş halda əmələ gələ bilir.

Ateromanın əmələ gəlməsində hormonal disbalansın və yağ-piy mübadiləsinin pozulmasının səbəb olduğu düşünülür. Bəzi hallarda ateroma infeksiyalaşıb, iltihablaşa bilir. Bu zaman o qızarır və ağrılı olur. Bəzi hallarda ateroma özü qopub düşə bilir, irinli iltihabi kütləyə çevrildikdə isə müalicə tələb edir.

Ateromaların ölçüsü 1-5 sm-ə qədər ola bilir. Nadir hallarda 5 sm-dən irisinə də rast gəlmək mümkün olur. Bəzi hallarda ateromalar bədxassəli şişə çevrilə bilirlər, bu zaman həkim cərrahi yolla onu kəsib götürür.