ATU-nun kitab fonduna I Cərrahi xəstəliklər kafedrasının professorları Saday Əliyev və Nuru Bayramov tərəfindən yazılmış yeni monoqrafiya əlavə edilib. “Nekrozlaşdırıcı fassiit” adı altında tərtib edilmiş bu kitab irinli-septik cərrahiyyənin aktual probleminə həsr olunub. 

Aztibb.az-a ATU-dan bildirilib ki, 4 fəsildən ibarət kitabda nekrozlaşdırıcı fassiitin və Frunyeqanqrenasının epidemiologiyası, etiopatogenezi, müasir diaqnostikası və müalicəsi ətraflı şərh edilib. Kitabın elmi-praktik əhəmiyyəti ondan ibarətdir ki, nəşr nekrozlaşdırıcı fassiit və Frunye qanqrenasının ənənəvi və müasir diaqnostika üsullarını (rentgenoloji, USM, KT, MRT) əks etdirən əyani materiallarla zənginləşdirilib. Geniş və müasir ədəbiyyat mənbələrinə və çoxillik şəxsi təcrübələrinə əsaslanan müəlliflər xəstəliyin diaqnostikasında və müalicəsində multidissiplinar yanaşma prinsiplərinin prioritet rolunu qeyd ediblər.

Eyni zamanda, monoqrafiyanın elmi-praktik keyfiyyətin əsas göstəricilərindən biri olan ədəbiyyat siyahısı və xarici müəlliflərin qeyd olunan patologiyanın müxtəlif aspektlərini əks etdirən elmi işləri ilə zənginləşdirilməsi oxucuya bu xəstəlik haqqında daha geniş məlumat almaq imkanı yaradır.

Professorlar S.Əliyev və N.Bayramov tərəfindən yazılmış monoqrafiya praktik həkimlər, rezidentlər, Tibb Universitetinin tələbələri üçün faydalı elmi-praktik vəsaitdir.