Mərkəzi Gömrük Hospitalının 15 illik yubileyinə həsr olunan nəfis tərtibatda kataloq və təqvim hazırlanıb.
Aztibb.az xəbər verir ki, Hospitalın fəaliyyətini və uğurlarını əks etdirən 102 səhifəlik kataloqun ilk səhifəsində Azərbaycan Respublikası Prezidenti İlham Əliyevin Mərkəzi Gömrük Hospitalının yaradılmasına qədər Azərbaycan Respublikası Dövlət Gömrük Komitəsinin strukturu ilə bağlı verdiyi Fərman və digər əhəmiyyətli tarixlərə dair məlumat yer alıb.
Kataloqda Dövlət Gömrük Komitəsinin sədri, gömrük xidməti general-leytenantı Şahin Bağırovun və Dövlət Gömrük Komitəsinin Tibbi Xidmət İdarəsinin rəisi, tibb xidməti general-mayoru Ceyhun Məmmədovun yubiley münasibətilə təbrik sözləri təqdim edilib.
Nəşrdə, həmçinin Mərkəzi Gömrük Hospitalının şöbələri, tibbi xidmətləri və yüksəkixtisaslı tibbi heyəti haqqında materiallar verilib, fotoşəkillər və annotasiyalar yer alıb.
Qeyd edək ki, Mərkəzi Gömrük Hospitalının 15 illik yubileyinə dəyərli töhfə olan bu nəşr Azərbaycan səhiyyəsinin təbliği baxımından mühüm əhəmiyyətə malikdir.
