Onun sözlərinə görə, hamilələrin qida rasionunda fol turşusu, kalsium, fosfor, sink, dəmir, B, C, E vitaminləri ilə zəngin qida məhsulları mütləq olmalıdır. Artıq hamiləliyin 6-cı həftəsində uşağın skeletinin əsası qoyulur, buna görə də qidada kalsium və fosforun miqdarı yüksək olmalıdır. Məhz süd məhsullarında bu maddələrin miqdarı ideal nisbətdədir. Süddən başqa hamilənin qida rasionunda yoqurt, qatıq, xama, qaymaq və s. ola bilər.

 

Elmira Duxiyeva qeyd edib ki, 9 həftəlik hamiləlikdə qidada yarmalar, sitrus meyvələri, qara qarağat, itburnu meyvələrinə üstünlük verilməlidir. Bütün bu məhsulların tərkibində uşağın qan-damar sistemi üçün lazım olan P və C vitaminləri vardır. 10-cu həftədən etibarən ananın qidalanması əsasən qanyaranmaya kömək edən məhsullara yönəlməlidir. Bu dövrdə hamilə kəsmiyi çox yeməlidir. Kəsmik, həmçinin sümüklərin və dişlərin inkişafına müsbət təsir göstərir.

 

"Hamiləlik zamanı qidalanma əsasən fərdi xarakter daşıyır, lakin bir neçə ümumi qayda vardır ki, hamilə qadınların hər birinə uyğun gəlir. Hamilənin rasionunda yağsız ət, tərəvəz, meyvələr, kərə yağı, süd məhsulları, yarmalar, yumurta, quru meyvələr, balıq, təzə göyərti, çovdar çörəyi və s. kimi qidalar mütləq olmalıdır. Hamiləliyin pozitiv əhval-ruhiyyədə keçməsi də uşağın inkişafına müsbət təsir göstərir. Hamilə qadınlara fast-fud, qazlı içkilər, duzlu, aromatikləşdirilmiş, şirinləşdirilmiş, konservantlı qidaların istifadəsi məsləhət görülmür. Hamiləlik zamanı artıq çəki yığmaq qorxusundan yeməyi azaltmaq olmaz. Əgər ana və döl üçün təhlükəli çəki artımı olarsa,həkim-ginekoloq menyuda məhdudiyyət etməyi tövsiyə edəcək", - deyə o, bildirib.