Vaxtından əvvəl (hamiləliyin 7-ci ayında) dünyaya gələn körpə uzun müddət reanimasiyada yaşam mübarizəsi aparıb. Bütün bunlardan əlavə, o, böyrəyini itirmək təhlükəsi ilə üzləşib.

İlk görüşümüzdə körpə reanimasiyadan təzə çıxmışdı və böyrəyi ciddi şəkildə böyüdüyü üçün bizə gətirmişdilər. 4-cü dərəcəli böyrəyin böyüməsinin səbəbi böyrək ləyəninin sidik kanalı ilə qovuşduğu yerdə daralma idi (ureteropelvik daralma).

Aztibb.az xəbər verir ki, bu barədə Mərkəzi Klinikanın uzman uşaq cərrahı Fuad Hüseynov məlumat verib. Həkim bildirib ki, ağır anemiya ilə əlaqədar 3500 qr çəkisi olan körpəyə qan köçürülüb və böyrəyinin qorunması üçün Pyeloplastika əməliyyatı edilib.

Onun sözlərinə görə, böyrək ləyənindən çıxışda olan dar hissə çıxarılıb, sidik axarı böyrək ləyəninə tikilərək sidik axını təmin edilib.

Uzman həkim vurğulayıb ki, uğurlu əməliyyatdan sonra körpə tam sağlam şəkildə evə yola salınıb.