Dənizdə çimərkən ehtiyatsız davranışlar təhlükəli nəticələrə səbəb ola bilər. Vaxtında və düzgün yardım göstərməklə suda boğulanları xilas etmək olar.
Suda boğulma təsadüfi ölüm hallarından biridir.
Statistikaya əsasən, hər il dünyada 150 mindən çox bu növ ölüm hallarına rast gəlinir. Kişilər arasında boğulma riski qadınlarla müqayisədə 6 dəfə artıqdır. Bu, kişilərin suda daha yüksək riskli fəaliyyəti və davranışı ilə əlaqədardır.
Bu barədə Aztibb.az-a Sumqayıt Tibb Mərkəzinin Təcili Tibbi Yardım Stansiyasının həkim-terapevti Qasım Abdullayev məlumat verib.
Həkim bildirib ki, çox vaxt suda boğulmağa yorğunluq, suya baş vuran zaman zədə alma, spirtli içkilərdən istifadə, uzun müddət günəş şüaları altında qaldıqdan sonra suya girmə və digər hallar səbəb ola bilər.
Qasım Abdullayev qeyd edib ki, suda boğulma zamanı insan suyu udur və ağciyərlərdə ödem əmələ gəlməyə başlayır: "Əgər vaxtında tibbi yardım göstərilməsə, bu ödem də sonda ürək ağciyər çatışmazlığına səbəb olur və boğulanın ölümü ilə nəticələnə bilər.
Onun sözlərinə görə, belə halla qarşılaşan anda təcili tibbi yardım xidmətinə məlumat verilməli, daha sonra isə zəruri ilkin yardım göstərilməlidir: "Əgər zərərçəkənin huşu özündədirsə, tənəffüs və nəbzi qənaətbəxşdirsə, onu arxası üstə quru, sərt döşək üzərində başı aşağı uzatmaq, quru dəsmal və ya əllə ovuşduraraq geyindirmək lazımdır. Zərərçəkənə isti içkilər verib üstünü örtmək tövsiyə olunur. Zərərçəkənin huşu özündə deyilsə, tənəffüs və ürək fəaliyyəti dayanıbsa, tənəffüs yollarını təmizlədikdən sonra ona süni nəfəs verilməli, ürəyin qapalı masajı aparılmalıdır. Əlavə olaraq tənəffüs yollarından mayeni xaric etmək lazımdır. Həmin əməliyyat süni nəfəs verilməsinin gecikdirilməməsi üçün 10-15 saniyədən çox çəkməməlidir".
Terapevt bildirib ki, boğulan şəxsin huşu özünə qayıdarsa belə onu hospitalizasiya etmək lazımdır: "Göstərilən reanimasyon tədbirlər yaxşı nəticə verdikdən sonra xəstə evə buraxılır. Bəzən evdə olan zaman xəstədə ikincili boğulma deyilən hadisə baş verir. Xəstənin vəziyyəti pisləşir. Ağzından, burun dəliklərindən ifraz və ağciyər ödemi başlayır. Belə hallarda xəstə mütləq yenidən hospitalizasiya olunmalıdır".
