Aztibb.az xəbər verir ki, Bakı Baş Səhiyyə Mərkəzinin 19 nömrəli Şəhər Poliklinikasının nevroloqu Yeganə Cəfərova bildirib ki, nevroloji xəstəliklər heç bir üzvi patologiya olmadan yaranan psixoloji xəstəliklərdir:

 

“Bunlar psixoloji, sosial, genetik və bioloji olmaqla, 4 əsas səbəbdən yaranır. Psixoloji səbəb dedikdə, uşaqlıq dövründən hazırki yaşadək ailədaxili problemlərin nəticəsi, sosial səbəb dedikdə həyati ehtiyaclarını ödəyə bilməməsi (maddi vəziyyətinin kifayət qədər olmaması və s.), bioloji səbəblər dedikdə seratonin (xoşbəxtlik) hormonunun aşağı səviyyədə olması, genetik faktorlar dedikdə isə ailə üzvlərindən birində nevroloji xəstəliyinin olması misal göstərilə bilər”.

 

Mütəxəssis nevroloji patologiyaları ən "hiyləgər" xəstəliklərdən biri hesab edir. Onun sözlərinə görə, sinir sisteminin əksər patologiyaları uzun müddət klinik şəkil göstərməyə bilər. Nevroloji xəstəliklərə istənilən yaş qrupunda rast gəlinir. Müxtəlif simptomlarla özünü göstərən nevroloji xəstəliklər zamanı böyüklərdə əsasən, kəskin qan dövranının pozğunluqları, uşaqlarda isə inkişaf mərhələlərinin ləngiməsi, nitqin, əqlin gecikməsi və s. şikayətlər üstünlük təşkil edir. Nevroloji xəstəliklərin ən çox müşahidə olunduğu ünvan isə əhalinin sıx yaşadığı böyük şəhərlərdir:

 

“Xəstəliklərin yaranmasını sürətləndirən amillərdən biri də böyük şəhərin davamlı inkişafıdır. Çünki inkişafın sürətli getməsilə hər kəs eyni formada ayaqlaşa bilmir. İri şəhərlərdə yaşayan vətəndaşlarda sosial və ekoloji gərginliklər daha tez yaranır. Təbii ki, bu kimi faktorlar rayon və kənd tipli yaşayış məskənlərilə, həmçinin kiçik şəhərlərlə müqayisədə böyük şəhərlərdə yaşayanlarda nevroloji xəstəliklər daha çox yarada bilir”, - deyə nevroloq bildirib.

 

Y.Cəfərova qeyd edib ki, müalicə prosesində effektiv nəticə almaq üçün ilk növbədə ilkin səhiyyə xidməti göstərən tibb müəssisələrinə müraciət edilməlidir ki, xəstəliyin yaranma səbəbləri dəqiq araşdırılsın və inkişafının qarşısı vaxtında alınsın:

 

“Əgər səbəb psixoloji travma və ya gərginlikdirsə, bu halda emosiyaların həddən artıq yüksəlməsi hesabına əmələ gələn stress yükünü minimuma endirmək lazımdır. Bunun üçün yaranma səbəbinə uyğun nevrotik preparatlardan daha çox istifadə edilməlidir. Amma bunu özbaşına etmək qəti şəkildə yolverilməzdir. Yaxşı olar ki, hər hansı nevroloji simptomları özündə hiss edən şəxs ilk növbədə ilkin səhiyyə xidməti göstərən tibb müəssisələrinə müraciət etsin. Vaxtında müayinə və müəlicə çox önəmlidir!”