Araşdırmalar göstərir ki, həftədə yarım saat mobil telefonla danışmaq yüksək təzyiq riskini artıra bilər.

Aztibb.az bu barədə medimagazin.com.tr-yə istinadla xəbər verir.

Daily Mail-in xəbərinə görə, Çinin Cənub Tibb Universitetindən bir qrup mütəxəssis cib telefonu ilə danışmaq və yüksək təzyiq riski arasında əlaqə olub-olmadığını araşdırıb.

Araşdırma çərçivəsində İngiltərədə təxminən 200 min yetkin 12 il ərzində təqib edilib.

Tədqiqat göstərib ki, həftədə 30 dəqiqə və ya daha çox telefondan istifadə edənlərin yüksək qan təzyiqi riski az danışanlara nisbətən 12 faiz çoxdur.

Qeyd olunub ki, yüksək təzyiqə tutulma riski ən yüksək olan qrup gündə bir saat müntəzəm olaraq telefonla danışan şəxslərdir.

Həmçinin məlum olub ki, həftədə 6 saatdan çox telefonla danışanların yüksək təzyiqə tutulma ehtimalı 5 dəqiqədən az danışanlara nisbətən 25 faiz çoxdur.

Tədqiqatçılar bildiriblər ki, mobil telefondan istifadə ilə yüksək qan təzyiqi arasında əlaqə qurğuların yaydığı radiotezlik enerjisinin aşağı səviyyədə olması ilə bağlı ola bilər.