Ölkəmizdə mamalıq və ginekologiya sahəsində tanınmış həkim-mütəxəssislərdən biri də Şamama Ələsgərovadır.

XX əsrin sayılıb-seçilən mama-ginekoloqu, Azərbaycan SSR Ali Sovetinin IX çağırış deputatı olan Ş.Ələsgərova 1904-1977-ci illərdə yaşamışdır. O, ilk təhsilini gimnaziyada almış, daha sonra Azərbaycan Tibb İnstitutuna daxil olmuşdur.

Əsasən ana və uşaqların sağlamlığının qorunması, ginekoloji xəstəliklərin müalicə və profilaktikası kimi mövzuları tədqiqat sahəsinə daxil edən Ş.Ələsgərova Azərbaycanda malyariya və helmintoz xəstəliklərinə qarşı mübarizə tədbirlərində də fəal iştirak etmişdir.

O, 1945-ci ildə N.Krupskaya adlı 5 nömrəli klinik doğum evinə baş həkim təyin olunmuş və ömrünün sonuna kimi həmin vəzifəni yerinə yetirmişdir.

Şamama Ələsgərovanın rəhbərliyi və yüksək təşkilatçılıq qabiliyyəti sayəsində doğum evi respublikanın iri müalicə profilaktika idarəsinə çevrilmiş və keçmiş ittifaqda geniş şöhrət qazanmışdı. Həkim kadr seçiminə də xüsusi diqqət yetirirdi.

O, 1958-ci ildə Səhiyyə əlaçısı, 2 il sonra respublikanın Əməkdar həkimi adına layiq görülmüşdür. 1969-cu il fevralın 5-də ona xidmətlərinə görə Sosialist Əməyi Qəhrəmanı adı verilmişdir. Ş.Ələsgərova respublikada bu ada layiq görülən ilk səhiyyə işçisi idi.

Həkim haqqında "Pravda”, "İzvestiya”, "Komsomolskaya Pravda”, "Bakı” və digər mərkəzi orqanlarda müntəzəm olaraq məqalələr dərc edilmişdir.

"Şərəf nişanı” ordeni və medallarla tətlif edilmiş Ş.Ələsgərova Azərbaycanda mamalıq və ginekologiya sahəsində sayılıb-seçilən həkimlərdən olmuşdur.