AMEA-nın akademik Abdulla Qarayev adına Fiziologiya İnstitutu və D.O.Ott adına Mamalıq, Ginekologiya və Reproduktologiya Elmi-Tədqiqat İnstitutunun əməkdaşlarının birgə elmi-tədqiqat layihəsi 2021-ci ildə uğurla başa çatıb.

“Bukkal epitelidə siqnal molekulların ekspressiyası: homeostazın stabilliyinin qiymətləndirilməsi və sosial-əhəmiyyətli insan xəstəliklərinin diaqnostikası və proqnozunun optimallaşdırılması üçün markerlər panelinin işlənilməsinə yeni yanaşmalar” adlanan layihə Azərbaycan Respublikasının Prezidenti yanında Elmin İnkişafı Fondu tərəfindən 1-ci Azərbaycan-Rusiya beynəlxalq qrant müsabiqəsi çərçivəsində maliyyə dəstəyi ilə həyata keçirilib.

Birgə layihənin Azərbaycan tərəfdən rəhbəri Fiziologiya İnstitutunun elmi işlər üzrə direktor müavini, fizika-riyaziyyat elmləri doktoru, professor Əhməd Hacıyevin sözlərinə görə, aparılan tədqiqatların nəticələri bir sıra sosial əhəmiyyətli, o cümlədən qocalma ilə bağlı xəstəliklərin molekulyar markerlər əsasında qeyri-invaziv diaqnostikası üçün bukkal epiteli nümunələrinin istifadəsinə yol açır. Rusiya Federasiyasının nüfuzlu  jurnallarında (“Molekulyar Tibb Jurnalı”, “Kliniki Patofiziologiya”) rusiyalı alimlərlə birgə layihəyə dair məqalələr çap olunub. Beynəlxalq səviyyəli yüksək impakt faktorlu “Beynəlxalq Molekulyar Elmlər Jurnalı”nda (“International Journal of Molecular Sciences”, IF 4.556) qocalma proseslərinin yaş xəstəlikləri fonunda qiymətləndirilməsi üçün melatonin və sirtuin molekullarının biomarkerlər kimi istifadəsinə həsr olunmuş məqalə artıq işıq üzü görüb.

Fiziologiya İnstitutunun baş direktoru, biologiya elmləri direktoru, professor Ulduz Həşimovanın Azərbaycan-Rusiya birgə layihəsinin uğurla başa çatmasında layihənin təşəbbüskarı kimi və elmi-təşkilati dəstəyi xüsusi rol oynayıb.