Hər kəsin arzusu qocalığını sağlam şəkildə keçirməkdir. Bu prosesi ən yaxşı şəkildə keçmək üçün mütəxəssislərin qidalanma, yuxu, fiziki fəaliyyət və hobbi ilə bağlı tövsiyələri var.

Aztibb.az “TRT Haber”ə istinadən xəbər verir ki, bir çox ölkələrdə hər il “Milli Yaşlılar Həftəsi” elan edilir ki, bu qocalıq və yaşlı sağlamlığı ilə bağlı məlumatlılığın artırılması məqsədi daşıyır.Yaşlanma insan həyatının təbii bir parçasıdır. Əsas odur ki, bu prosesi mümkün qədər rahat keçəsiniz. Çünki yaşla bir çox sağlamlıq problemləri yaranır. Bu səbəblə xüsusilə yaşlı insanların özlərinə hər zamankindən daha çox diqqət etmələri lazımdır.

Yaşlı əhalinin artması sağlamlıq problemlərinin də artacağından xəbər verir. Bu səbəbdən qocalığa gedən yolda sağlam qalmaq üçün atılacaq addımlar daha da əhəmiyyət kəsb edir. Bəs, qocalmış yaşda da sağlamlığımızı qorumaq üçün nə etməliyik?

Professor Mehmet İlkin Naharcı sağlam yaşlanmaqla bağlı bəzi tövsiyələrini verib:

“Yaşlı insanların çoxlu problemləri olduğu üçün prosesin hamısını eyni anda həll edə bilən bir həkim tərəfindən idarə olunması daha məntiqlidir”.

Bəs, sağlam qocalıq üçün nələrə diqqət edilməlidir?

"İlk növbədə, 65 yaşdan yuxarı insanlar müntəzəm sağlamlıq müayinələrinə laqeyd olmamalıdırlar", - deyə professor bildirib:

“Yaşlarına görə bir çox xəstəliklərə tutulma riski var. Onların xroniki xəstəlikləri mütləq müalicə olunmalıdır. Onlar nəzərə almalıdırlar ki, yaşlılarda yarana biləcək problemlər həll olunmaz deyil. Məsələn, unutqanlıq, yıxılma, tarazlığın pozulması, sidik qaçırma kimi problemlərin həlli olduğunu bilsinlər. Onlar həkimin rəhbərliyi və ya məsləhəti ilə həll yoluna gələ bilərlər”.

Fiziki fəaliyyət tövsiyəsi

Siqaret, spirtli içki kimi vərdişlərdən uzaq durmaq hər yaşda olduğu kimi bu dövrdə də böyük əhəmiyyət kəsb edir. Yaşla fiziki fəaliyyət qaçılmaz olaraq azalır. Bununla belə, professor vurğulayıb ki, fiziki aktivliyi artırmaq hər baxımdan faydalıdır, onlar gəzə, velosiped sürə və ya bağçılıqla məşğul ola bilərlər.

Daimi və adekvat qidalanma tələb olunur

Diqqət yetirilməsi lazım olan digər məqam isə yuxu rejimidir. Gündə ən az 6-7 saat yatmağın vacib olduğunu söyləyən ekspert diqqət yetirilməsi lazım olan başqa bir məqamı gündəmə gətirib:

“Qidalanmaya diqqət yetirmək lazımdır. Problemlər həddindən artıq qidalanma və ya əksinə, az qidalanma səbəbindən yarana bilər. Bu səbəbdən yeməkləri atlamamalısınız. Yaşlı insanlar gündə ən azı 3 dəfə əsas yeməklə qidalanmalıdırlar. Onlar salatlar və ətli qidalar istehlak etməlidirlər. Zeytun yağının istehlakı da tərkibindəki omeqa-3 yağ turşularına görə çox vacibdir. Qan təzyiqi və damar xəstəliklərinə səbəb olduğu üçün duz qəbulunda diqqətli olmalısınız. Bu yaşda nəzərə alınmayan başqa bir məsələ sudur. Kifayət qədər su içmək lazımdır. Çəkidən asılı olaraq dəyişə bilsə də, gündə ən az 6-8 stəkan su içmək lazımdır. "Bu, həm fiziki, həm də ruhi sağlamlığımıza fayda verəcək bir toxunuş olacaq".