İnsulin dirənci orqanizmin hüceyrə səviyyəsində insulinə qarşı həssaslığın (tolerantlığın) pozulmasıdır. Bütün hüceyrələrin əsas qida maddəsi olan qlükoza insulinin təsiri nəticəsində hüceyrələrə daxil olur və mənimsənilir.

Aztibb.az xəbər verir ki, endokrinoloq Fərhad Burzu bildirib ki, insulinin dirənci zamanı bu mexanizm pozulur yəni hüceyrələrdəki insulin reseptorları həssaslığını itirir və qlükozanın hüceyrə daxilinə keçmə prosesi baş vermir nəticədə orqanizm davamlı aclıq halında olur.

Həkim qeyd edib ki, qlükozanın istifadə edilə bilməməsi və qanda miqdarının artması nəticəsində mədəaltı vəz qlükozanın hüceyrələrə daxil olmasına kömək etmək üçün daha çox insulin istehsal edir.

Endokrinoloq kimlərdə insulin dirəncinin inkişaf etmə ehtimalının daha çox olduğunu bildirib: "İnsulin dirəncinin yaranma ehtimalı əsasən genetik yolla baş verir, eyni zamanda oturaq həyat tərzi keçirən insanlarda da çox rastlanılır".

Mütəxəsssis qeyd olunan mexanizmin pozulmasına səbəb bir sıra risk faktorlarını sadalayıb:

- artıq çəki və ya piylənmə;
- 45 yaş və yuxarı;
- diabeti olan birinci dərəcəli qohumlar (ata, ana və s.)
- yüksək arterial təzyiq və xolesterol səviyyələri;
- fiziki fəaliyyətsizlik;
- hestational diabet (hamiləlik diabeti);
- ürək xəstəliyi;
- polikistik yumurtalıq sindromu (PCOS);

Həkim vurğulayıb ki, irsiyyət, yaş kimi risk faktorlarını dəyişdirə bilməsək də, qidalanma, fiziki fəaliyyət və artıq çəki kimi bəzi həyat tərzinə bağlı risk faktorlarını dəyişə bilərik.

"Düzənli həyat tərzi dəyişiklikləri ilə insulin dirənci inkişafının qarşısını ala bilərik. Unutmamaq lazımdır ki, insulin rezistentliyinin ağırlaşması olaraq diabet olmadan tədbir görülməsi çox vacibdir", - deyə həkim yekunlaşdırıb.