Qurban bayramında kəsdiyimiz qurbanların sağlam olması sağlamlığımızı qorumaq üçün çox önəmlidir. Bu səbəbdən seçiləcək qurbanlıq və kəsim zamanı keçə biləcək xəstəliklərə diqqət yetirmək lazımdır.
Aztibb.az xəbər verir ki, mikrobiologiya mütəxəssisi Dr. Ramazan Gözüçukla instaqarmada səhifəsində bununla bağlı məlumat paylaşıb.
Qurban ətindən keçə bilən bəzi xəstəliklər:
Qarayara: Ev heyvanlarından (inək, qoyun, keçi və s.) insanlara birbaşa təmas və ya heyvan mənşəli məhsullarla keçən ümumi zoonozdur. Bu, adətən yoluxmuş heyvanların məhsulları və ya torpaqda olan qarayara sporları dəridəki açıq yaralar vasitəsilə dəri ilə təmasda olduqda baş verir. Müalicə olunmayan infeksiyalar regional limfa düyünlərinə və qan dövranına yayılaraq ölümlə nəticələnə bilər.
Salmonellyoz: Salmonellaların yaratdığı infeksiyalara demək olar ki, bütün dünyada rast gəlinir. İnfeksiya çirklənmiş qida və su (xüsusilə qarışıq çirkab suları) istehlak etməklə ötürülür. Xəstəlik zəiflik, baş ağrısı və qızdırma ilə özünü göstərir.
Toksoplazmoz: İnsana parazitin kistaları olan çiy və ya az bişmiş ətin qəbulu və yoluxmuş pişik nəcisi ilə ifraz olunan kistaların çirklənmiş su və qida ilə qəbulu ilə ötürülür. Pişiklər infeksiyanın əsas mənbəyidir. Limfa düyünlərini böyüdə bilər. Əgər ana hamiləlik zamanı ilk dəfə yoluxmuş olarsa, parazit körpəyə keçə bilər.
Brusellyoz: Heyvanların (inək, qoyun, keçi və s.) qanı, döl və ya uşaqlıq yolu ilə bilavasitə təmasda olması və ya yoluxmuş çiy heyvan mənşəli məhsulların (xüsusilə təzə pendir, süd və süd məhsulları) qəbulu ilə yoluxan xəstəlikdir. Kəskin başlayan qızdırma, yorğunluq, iştahsızlıq, arıqlama, baş ağrısı, xüsusilə gecələr güclü tərləmə, bədəndə geniş yayılmış əzələ və oynaq ağrıları ilə özünü göstərir.
Vərəm: Vərəm adətən hava yolu ilə birbaşa insandan insana ötürülür. Bütün vərəm hallarının 80-90%-i ağciyərlərdə olur. Xəstəliyə zəiflik, yorğunluq, arıqlama, uşaqlarda çəki artımında fasilə, qızdırma və gecə tərləmələri ilə uzun müddət davam edən öskürək, qanlı və ya qansız bəlğəm, sinə və ya bel ağrısı, nəfəs darlığı ola bilər.
Bəzi sadə qaydalarla bu xəstəliklərin qarşısını almaq olar. Xüsusilə Qurban bayramı zamanı çoxlu sayda heyvanın kəsimdən əvvəl və sonra lazımi nəzarət və gigiyena qaydalarına diqqət yetirilməməsi, kəsilən heyvanların ətinin istehlakında bir çox zoonoz xəstəliklərin yayılmasına yol açır.
Ət heç vaxt çiy və ya az bişmiş halda istehlak edilməməlidir. Ətin daşınması, saxlanması, bişirilməsi və istehlaka təqdim edilməsi mərhələlərində şəxsi gigiyena qaydalarına laqeyd yanaşılmamalıdır.
