Texas Universitetinin tədqiqatçıları zehni oxuma sistemi yaradıblar. O, insan beyninin fəaliyyətinin təsvirlərini oxuya və onları mətnə çevirə bilir.

Aztibb.az xəbər verir ki, “Nature Neuroscience” jurnalının məlumatına görə, belə süni intellekt sistemi semantik dekoder adlanır. Onun əsas məqsədi xüsusilə insultdan sonra danışma qabiliyyətini itirmiş, lakin şüurunu saxlayan insanlara kömək etməkdir.

Daha əvvəl bənzər kəşf beyinə implantasiya edilməli olan implantlara əsaslanırdı. Lakin bu alqoritm qeyri-invazivdir, yəni bədənə nüfuz etməyi tələb etmir.

Beyin fəaliyyəti funksional maqnit rezonans görüntüləmə (fMRI) vasitəsilə qeydə alınır və sonra bu siqnallar dekoder vasitəsilə insan dilinə tərcümə olunur.

Alimlər süni intellekt təlimi üçün üç nəfərin beyin reaksiyasını qeydə alıblar. Dekoder insanların sözlər və ifadələr ardıcıllığına reaksiyalarını izləyib və sonra onu əks prosesdə istifadə etmək üçün yaddaşda saxlayıb. İnsanın beyninin sözlər ardıcıllığına necə reaksiya verəcəyini dəqiqliklə proqnozlaşdıra bilib.