Aritmiya hər zaman ürəkdöyünmə, çırpınma demək deyil. Çırpınma, ürəkdöyünmə də hər zaman aritmiya demək deyil. Biz qaçarkən, pilləkən qalxarkən, həyəcan keçirərkən, qorxarkən və s. ürək vurğularımızın dəqiqəlik sayı, yəni nəbzimiz qalxır. Belə hallarda nəbzin nə qədər qalxmağı beynimiz vasitəsilə tənzimlənir. Bu zaman biz ürəkdöyüntü, çırpınma, ürək sanki döş qəfəsindən çıxacaqmış kimi hiss edərik. Nəbzin belə yüksəlməsi tam normal bir hadisədir və adətən ürək xəstəlikləri ilə bağlı olmur.

Aztibb.az xəbər verir ki, bu bardə kardioloq-aritmoloq Emin Kərimli məlumat verib.

Həkim bildirib ki, nəbz həmçinin yüksək hərarət, tiroid xəstəlikləri, qanazlığı və s. zamanı da yüksək ola bilər. Aritmiyalar zamanı isə ürək beynin nəzarətindən çıxır. Nəbz səbəbsiz yüksəlir və ya səbəbsiz enir.

"Aritmiyalar zamanı nəbz adətən heç bir səbəb olmadan və gözlənilmədən ani yüksəlir. Ürəkdöyünməsi saniyələrdən tutmuş günlərlə davam edə bilər. Nəbzin düzəlməsi də adətən qəfləti olur. Bəzən isə nəbz öz-özünə düzəlmir, venadaxili dərman vurulmaqla və ya elektrik kardioversiya ilə düzəlir. Bəzən aritmiyalı xəstələrin heç bir şikayəti olmur", deyə E.Kərimli bildirib. 

Həkimin sözlərinə görə, aritmiyaların bəziləri həyati təhlükəlidir, bəzilərinin isə təhlükəsi azdır. Hər bir növün müalicəsi də fərqlidir. Dəqiq diaqnoz aritmiya vaxtı çəkilən EKQ ilə qoyulur. Aritmiyaların bəziləri dərman müalicəsinə tabe olsa da, köklü müalicə yolu radiotezlikli ablasiyadır.