Bədən temperaturunun qalxması uşaqlarda kəskin və xroniki xəstəliklər zamanı baş verir.

Aztibb.az xəbər verir ki, qızdırmanı yaradan səbəblər uşağın yaşından və digər faktorlardan asılı olaraq müxtəlifdir.

Temperatur yüksəlmə dərəcəsinə görə subfebril (37-38 dərəcə), yüksək (39-41 dərcə) və ya çox yüksək ( 41 dərəcədəndən yüksək) olur.

Kiçik uşaqlar adətən, yüksək hərarəti yüngül keçirir. Məsələn, adi kəskin respirator xəstəliklərdə (KRX) böyüklərdə  38-38,5 dərəcə, körpələrdə 39-40 dərəcə ola bilər. Yadda saxlamaq lazımdır ki, çox yüksək qızdırmada maddələr mübadiləsi pozulur. İnfeksion xəstəliklərdə qızdırmanın olmaması orqanizmin reaktivliyinin olmaması deməkdir.

Simtomları:

Uşağın xarici görünüşünə görə hərarətin yüksəlməsindən şübhələnmək olar.

Uşağın ümumi vəziyyəti dəyişir, narahatlıq, əzginlik yaranır, iştaha azalır və ya itir. Qızdırmanın tipindən asılı olaraq uşağın dərisi qaynar, solğun, qırmızı və ya sərin ola bilər. Çox vaxt yanğı hissiyatı yaranır, körpə uşaqlarda qıcolmalar müşahidə edilir.

Səbəbləri:

Xəstəliklərin bir çoxu qızdırma ilə keçir. Ən çox virus və bakterial infeksiyalar qızdırma ilə müşayiət olunur. Allergik reaksiyalar, birləşdirici toxumanın xəstəlikləri, endokrin patologiya və s. xəstəliklərdə də qızdırma ola bilər.

37 dərəcəyə qədər qızdırma olduqda narahat olmağa dəyməz. Əgər 38 dərəcədən yuxarı olarsa hərarəti tez-tez ölçmək lazımdır. Yüksək qızdırmada həkim gələnə qədər uşağa parasetamol, uşaq panadolu, uşaq taylenolu vermək olar.

Bu zaman uşağa çoxlu maye içirtmək, qalın geyimləri çıxartmaq, bədəni yaş dəsmalla silmək məsləhətdir.

Əgər uşaqda qıcolma başlayırsa onu yumşaq çarpayıya və ya xalçaya böyrü üstə uzatmaq və təcili yardım çağırmaq lazımdır.

Həkim uşağı müayinə etdikdən sonra müvafiq müalicə təyin edəcək.